च्याम्पियन्स लिगमा बार्सिलोनाले ओलम्पियाकोसको सामना गर्दै

बार्सिलोना (एजेन्सी) स्पेनिस क्लब बार्सिलाेनाले च्याम्पियन्स लिगमा ग्रिक क्लब ओलम्पियाकोसको सामना गर्दै छ । लिगको समूह डि अन्तर्गत बार्सिलोनाको घरेलु मैदान नु क्याम्पमा खेलिने सो खेल नेपाली समय अनुसार रातिको १२:३० बजे सुरु हुने छ ।

बार्सिलोना लामो समयका लागि घाइते रहेका राफिन्हा, उस्माने डेम्बेले र आर्दा टुरान बिना मैदानमा उत्रिने छ । नियमित खेलाउने ४-३-३ फर्मेसनको साटो लियोनल मेस्सी र लुइस स्वारेजलाई अगाडि खेलाउँदै बार्सिलोनाले ४-४-२ फर्मेसन खेलाउने सम्भावना धेरै छ ।

यस साता घरेलु लिगमा पानियोनियोसलाई ४-३ ले हराएको ओलम्पियाकोसका लागि भने जागोस भुकोभिच र बेन नाबुहाने चोटग्रस्त रहेकाले खेलमा सहभागी हुने छैनन् । ओलम्पियाकोसले समूह चराणका आफ्ना दुवै खेलमा हार बेहोरेको छ ।

अर्को तर्फ घरेलु लिगमा एट्लेटिको म्याड्रिड विरुद्ध १–१ को बराबरी खेलेको बार्सिलोनाले समूह चरणको दुवै खेल जितेको छ । च्याम्पियन्स लिगका पछिल्ला तीन खेलमा गोल नखाएको घरेलु टोली आफ्नो त्यस लयलाई निरन्तरता दिन खोज्ने छ । बार्सिलोना अहिले ६ अंकसहित समूहको शीर्ष स्थानमा रहेको छ । हरेक समूहबाट शीर्ष दुई टिम लिगकाे अन्तिम–१६ मा पुग्छन् ।