बाढी प्रभावित क्षेत्रमा हुनुहुन्छ भने यी कुरामा ध्यान दिनुहोस्

“

काठमाडौं, साउन ३० – बाढी पहिरोका कारण पानी तथा किटजन्य रोगको संक्रमण फैलने जोखिम बढेको छ । बाढीपहिरो र डुबानसँगै हैजा, झाडापखाला, आउँ, टाइफाइड, हेपाटाइटिस ए, ई र मलेरिया लगायत रोगको संक्रमणको जोखिम बढेकाले सतर्कता अपनाउन स्वास्थ्य मन्त्रालयले आग्रह गरेको छ ।

मन्त्रालयले सार्वजनिक सूचना निकालेर पानी राम्रोसँग उमालेर वा क्लोरिन झोल वा ट्याब्लेट राखेर मात्र पिउन सुझाव दिएको छ । यस्तै खानेपानीलाई सफा भाँडोमा राखेर छोप्न, गाईंभैँसीको दूध राम्ररी उमालेर मात्र पिउन तथा नपाकेका अर्थात काँचो खानेकुरा सकभर नखान मन्त्रालयले आग्रह गरेको छ । यस्तै मरेका पशुपन्क्षीलाई खाल्डो खनेर गाड्न तथा चर्पीमा मात्र दिसापिसाब गर्न पनि अनुरोध गरिएको छ ।

यसैगरी लाखुट्टेको टोकाइबाट बच्न झुल टाँगेर मात्र सुत्न, नियमित औषधि खानु पर्ने बिरामीलाई निरन्तरता दिन र आमाको दूध पिउने बच्चालाई लगातार दूध खुवाउन पनि मन्त्रालयले अनुरोध गरेको छ ।

सम्भावित महामारीबाट बच्ने उपाय

अस्थायी पाल वा शिविरमा बस्ने सबैले आफू बसेको ठाउँ वरिपरी सरसफाई गर्ने
खानेपानी शुद्धिकरण गरेर पिउने, धमिलो पानी उमालेर वा पियूषको प्रयोग गर्ने
अस्थायी शौचालयको व्यवस्था गरी शौचालयमा मात्र दिसापिसाब गर्ने
हावाबाट फैलने रोगहरुका सर्न नदिन मास्कको प्रयोग गर्ने
खाना खानुअघि, दिसापिसाब गरेपछि साबुन पानीले राम्रोसँग हात धुने र बालबालिकालाई पनि धुन लगाउने ।
यदि पेट दुख्ने, पखाला लाग्ने, वाकवाकी हुने, टाउको दुख्ने जस्ता समस्या भैहालेमा नजिकै स्वास्थ्य टोली भेटिएमा जानकारी गराउने र सकेसम्म छिटो स्वास्थ्य केन्द्रमा जाने ।

स्वास्थ्य मन्त्रालयले बाढी र पहिरो प्रभावित क्षेत्रमा छुट्टाछुट्टै विपद् व्यवस्थापन टोली खटाएको छ ।

सात दिन निःशुल्क स्वास्थ्य सेवा

चिकित्सा सेवा महाशाखाका प्रमुख डा. भोलाराम श्रेष्ठले प्रभावित जिल्लाका सबै अस्पतालमा सात दिनसम्मका लागि निःशुल्क स्वास्थ्य सेवा उपलब्ध गराउन निर्देशन दिइएको बताउनुभयो ।

इपिडिमियोलोजी तथा सरुवा रोग नियन्त्रण महाशाखाका निर्देशक डा. भीम आचार्यले संक्रमण फैलनसक्ने सम्भावनालाई ध्यान राखी पानी उमालेर र शुद्धीकरण गरेर पिउन आग्रह गर्नुभएको छ ।

मन्त्रालयले सरुवा रोग महाशाखाको हटलाइन नम्बर ०१-४१००१८७/०१-४२६२२६८ र मोबाइल नम्बर ९८५१०९६०८९ सम्र्पक गरी सहयोग समन्वय गर्न पनि सबैलाई आग्रह गरेको छ ।

“