ज्योर्तिलिंग दर्शन गर्न पूर्व राजा धनगढी आउँदै

धनगढी, पुस १७ । पूर्वराजा ज्ञानेन्द्र शाह धनगढी आउने भएका छन् । उनको नीजि सचिवालयले पुर्वराजाले धनगढीको उत्तरबेहडीस्थित शिवपुरी धाममा रहेको १०८ फिट अग्लो उत्तररामेश्वरम ज्योर्तिलिंगको सपरिवार दर्शन गर्ने कार्यक्रम रहेको जनाएको छ ।

नेपालगञ्जमा निर्माण भईरहेको सोल्टी होटल प्रालीको उद्घाटनका लागि पुर्वराजा एक हप्तादेखि सपरिवार नेपालगञ्जमा छन् । सोल्टी होटलमा पुर्वराजाको लगानी रहेको बताईन्छ । मंगलबार धनगढी आउने पूर्वराजाको स्वागतका लागि धनगढीमा राजावादीहरुले कैंया चौधरीको संयोजकत्वमा १०१ सदस्यीय मुल स्वागत समिति गठन गरेका छन ।

पुर्वराजासँगै पुर्व रानी कोमल, बुहारी हिमानी र नातीनि प्रेरणा शाह पनि धनगढी आउने कार्यक्रम रहेको मुल स्वागत समितिले जनाएको छ । तर पुर्वराजाका स्वकीय सचिव शागर तिमिल्सेनाले भने सुदूरपश्चिम भ्रमणको तालिका भने अझै बनी नसकेको जानकारी दिए ।

पुर्वराजाको सुरक्षा दस्ता र सचिवालयका प्रतिनिधि सोमवार धनगढी आउने कार्यक्रम रहेको स्रोतले जनाएको छ । दुईवर्ष अघि पनि पुर्वराजा एक हप्तासम्म धनगढीको रुवस होटलमा सपरिवार बसेका थिए ।