लाजिम्पाट पुगेर राष्ट्रपतिले दिईन् दाहाललाई श्रद्धाञ्जली

“

मंसिर ४, काठमाडौं । राष्ट्रपति विद्यादेवी भण्डारीले दिवंगत प्रकाश दाहालप्रति श्रद्धाञ्जली अर्पण गरेकी छन् । सोमबार बिहान साढे ९ बजे लाजिम्पाटस्थित प्रचण्ड निवास पुगेर राष्ट्रपति भण्डारीले प्रकाश दाहाललाई श्रद्धाञ्जली दिईन् ।

उनले प्रकाशको तस्वीरमा पुष्पगुच्छा चढाउँदै श्रद्धाञ्जली अर्पण गरेकी थिइन् । साथै शोकाकुल परिवारलाई भेटेर समवेदना व्यक्त गरेको प्रचण्डको सचिवालयले जनाएको छ ।

प्रचण्डपुत्र प्रकाश दाहालको आइतबार बिहान आकस्मिक हृदयाघातबाट निधन भएको थियो । निधनको खबर पाएलगत्तै राष्ट्रपति भण्डारी आइतबार पनि प्रचण्ड निवास पुगेकी थिइन् ।

दाहाल परिवारलाई भेट्न जानेहरुको सोमबार बिहान पनि भिडभाड छ ।

“