दैलेख : बस दुर्घटनामा मृत्यु भएका सबैको सनाखत

१ असार, दैलेख । दैलेखमा भएको बस दुर्घटनामा मृत्यु भएका सबैको सनाखत भएको छ । कालिकोटको जितेगडाबाट कञ्चनपुरको महेन्द्रनगरका लागि छुटेको ना ४ ख २९९८ नम्बरको बस दैलेखको आठबिस नगरपालिका ४ नैनाल भन्ने स्थानमा दुर्घटना भएको थियो । बस करिब २/३ सय मिटर तल खसेको जिल्ला प्रहरी कार्यालय दैलेखका प्रहरी निरीक्षक एकेन्द्र खड्काले जानकारी दिनुभएको थियो ।

दुर्घटनामा मृत्यु हुनेमा रासकोट नगरपालिका कालिकोटका धर्मराज शाही, प्रकाश शाही, कविता शाही, मेनका फर्साल र युवराज शाही रहेका छन् ।

त्यस्तै विनायक नगरपालिका अछामका सिगे नेपाली र उनकी छोरी रुपा नेपालीको पनि मृत्यु भएको छ ।

यसैगरी कालिकोटको सान्नित्रिवेणीका प्रकाश शाही र होइजाली सुनारको पनि दुर्घटनामा मृत्यु भएको छ । अछाम भैरवस्थानका धिरेन्द्र विसी र बाजुराका मंगल कसेराको पनि दुर्घटनामा मृत्यु भएको प्रहरीले जनाएको छ ।