पुनर्वास नगरपालिकाको मतगणना अझै सञ्चालन हुन सकेन

“

भीमदत्तनगर, १९ असार । राजनीतिक विवादका कारण कञ्चनपुरको पुनर्वास नगरपालिकाको मतगणना दुई दिनदेखि स्थगित भएका छन् । नेपाली काँग्रेस र नेकपा (माओवादी केन्द्र)का कार्यकर्ताले वडा नं १ मा फर्जी मत परेको दाबी गर्दै विरोध जनाएपछि शनिबार दिउँसो ३ बजेदेखि स्थगित भएको मतगणना अझैसम्म सञ्चालन हुन सकेको छैन् ।

मतगणना सुचारु गर्नका लागि आइतबार साँझ सर्वदलीय बैठक डाकिएको भएपनि राजनीतिक सहमति हुन नसकेकाले मतगणना हुन नसेको पुनर्वास नगरपालिकाका निर्वाचन अधिकृत रमेश गौतमले जानकारी दिनुभयो । “पहिलो वडा नं १ को मात्रै पुनःगणना गर्ने माग थियो,” उहाँले भन्नुभयो – “विरोधमा रहेका दलले गणना भएका सबै वडाको पुनःगणना गर्न माग राखेपछि सर्वदलीय बैठकमा सहमति जुट्न सकेन ।”

बैठकमा कांग्रेस र माओवादी केन्द्रले गणना भएका वडा १ देखि ६ सम्मको पुनः गणना हुनुपर्ने माग राखेका थिए । ‘यस सम्बन्धमा आवश्यक निर्देशनका लागि आयोगमा पत्राचार गरेका छौं,’ निर्वाचन अधिकृत गौतमले भन्नुभयो– ‘निर्वाचन आयोगको निर्देशन अनुसार अघि बढ्छौं ।’

उहाँले आयोगको निर्देशनपछि मतगणना अघि बढाउने जानकारी पनि दिनुभयो । पुनर्वास नगरपालिकामा कुल २१ हजार २७९ मत खसेको निर्वाचन अधिकृत गौतमले जानकारी दिनुभयो । मतगणना सम्पन्न भएका ६ वडामध्ये चारको वडाध्यक्षमा नेकपा एमाले र दुईको वडाध्यक्ष माओवादी केन्द्र विजयी भएका छन् । वडा नं १ मा फर्जी मत परेको विषयलाई लिएर दलका कार्यकर्ताबीच भएको झडपलाई नियन्त्रणमा लिन शनिवार प्रहरीलाई हवाइ फायर समेत गर्नुपरेको थियो । रासस

“