केकी अधिकारी हास्दै आएपछि…

असाेज २६, काठमाडाैं । नायिका केकी अधिकारीलाई पर्दा पछाडि राखेर केही महिनादेखि चलचित्र ‘ऐश्वर्य’को प्रचार गरिएको थियो । केकी अधिकारीले पनि प्रचारमा खासै साथ नदिने छनक देखाएकी थिइन । तर, एकपछि अर्को शैलीमा चलचित्रको हाइप बनाउँदै लगेका निर्माता तथा नायक रमेश उप्रेतीले प्रदर्शनको करिब २ साता अगाडि केकी अधिकारीलाई अगाडि ल्याएका छन् ।

चलचित्रको ट्रेलरमा केकीको केही दृश्य राखिएको थियो । तर, निर्माता उप्रेती र निर्देशक दिवाकर भट्टरार्इले चलचित्रको नयाँ पोष्टरमा केकीलाई अगाडि ल्याएका हुन् । निर्देशक भट्टराई आफूहरूले प्रचारको शैली अनुसार नै केकीलाई बल्ल अगाडि ल्याएको बताउँछन् । केकीको चलचित्रमा महत्त्वपूर्ण भूमिका रहेको उनले बताए ।

नेपाली चलचित्रमा आजसम्म कुनै पनि हिट चलचित्र दिन नसकेकी केकीका लागि ‘ऐश्वर्य’को व्यापार महत्त्वपूर्ण छ । सुरुमा चलचित्र प्रचारमा समय नदिने भन्दै बसेकी केकी अहिले ‘ऐश्वर्य’का लागि दौडधुप गरिरहेकी छिन् ।

चलचित्रमा रमेश उप्रेती, दीपिका प्रसाई, केकी अधिकारी, प्रशान्त ताम्राकार, अर्जुन श्रेष्ठ, निर्मल शर्मा लगायतका कलाकारको अभिनय रहेकाे छ । रमेश उप्रेती प्रस्तुतकर्ता रहेको चलचित्रमा अर्जुन श्रेष्ठ र किरण राणा उप्रेती निर्माता रहेका छन् । निर्मल शर्मा सह-निर्माता रहेको यस चलचित्रमा सुदीप बरालको छायाङ्कन रहेकाे छ । चलचित्र कात्तिक ९ गतेबाट प्रदर्शनमा आउनेछ ।