रोहिंग्यामाथिको हमला जातीय सफाया : संयुक्त राष्ट्रसंघ

काठमाडौं, भदौ २६ । संयुक्त राष्ट्रसंघको मानव अधिकार परिषदले म्यानमारमा केही समययता भड्किएको हिंसामा मुसलमान रोहिंग्यामाथि भएका हमला जातीय सफाया जस्तै भएको बताएको छ ।

राष्ट्रसंघको मानव अधिकार परिषदसमक्ष बोल्दै राष्ट्रसंघका मानव अधिकार प्रमुख जेइद राद अल हुसेनले म्यानमारमा मुसलमान रोहिंग्यामाथि भएका हमला जातीय सफाया जस्तै भएको बताएका हुन् ।

म्यानमार सरकारले हिंसाग्रस्त क्षेत्रमा राष्ट्रसंघका अनुसन्धानकर्ताहरुलाई जान रोकेको बताउँदै प्रमुख हुसेनले त्यहाँको वास्तविक अवस्थाबारे यथार्थ तथ्य बताउन नसकिने बताएको बीबीसीले उल्लेख गरेको छ ।

तर, रोहिंग्या समुदायको स्थितिलाई अध्ययन गर्दा जातीय सफाया झैं देखिएको उनले बताएका छन्
।
यसअघि बुद्धिस्ट धर्म गुरु दलाई लामाले रोहिंग्या मुसलमानहरुको बहिर्गमनबारे बोल्दै तिनलाई बुद्धले मद्दत गर्ने थिए भन्ने टिप्पणी गरेका छन् ।

केहि समय अघि राष्ट्रसंघका मानव अधिकार प्रमुख हुसेनले म्यानमारकी नेतृ आङ्ग सान सूचीलाई रोहिंग्याविरुद्धको निरन्तर हिंसा रोक्न कदम चाल्न अनुरोध गरेका थिए ।

गत अगष्ट २५ देखि सुरु भएको हिंसाका घटना यता हालसम्म करिब ३ लाख रोहिंग्या शरणार्थी भागेर छिमेकी बंगलादेश पुगेका राष्ट्रसंघले पुष्टि गरेको छ । साथै, आइतबार रोहिंग्या विद्रोहीले एकतर्फी युद्धविरामको घोषणा गरेपछि म्यानमार सरकारले अस्वीकार गरेको नेतृ आङ्ग सान सूचीकी प्रवक्ताले सोमबार ट्वीटरमार्फत बताएका छन् ।