धरानमा आगलागी, परिवारको बिचल्ली

कात्तिक २६, धरान । सुनसरीको धरान ५ कुलुङ चोक नजिकै आईतबार राति आगलागी हुँदा वीरबहादुर राईको घर जलेर नष्ट भएको छ । 

राति १० बजेको समयमा आगलागी हुँदा राईको नगद १२ हजार सहित एक तले टिनले बारेको घर पूर्णरूपमा जलेर नष्ट भएको इलाका प्रहरी कार्यालय धरानका डिएसपी सुमन कुमार तिम्सीनाले जानकारी दिए । 

आगलागी विजुली सर्ट भएर भएको प्रहरीको भनाइ छ । आगलागीबाट करिब ५ लाख बराबरको क्षति भएको अनुमान गरिएको छ । 

null

आगलागीको समयमा राई दम्पत्ति घर बाहिर रहेका र अकस्मात आगो लागेको देखेपछि उनीहरूले प्रहरीलाई खबर गरेका थिए । 

आगलागी नियन्त्रणका लागि धरान उपमहानगरपालिकाको दुई वटा दमकल प्रयोग गरिएको थियो भने प्रहरी, स्थानीय बासिन्दाले आगो नियन्त्रणमा सहयोग पुर्याएका थिए । आगलागी पश्चात् अहिले राई परिवारको बिचल्ली भएको छ ।