गाईगोठबाट फैलिएको आगोले ६ घर जल्यो

पुस १, लहान । लहानमा गाईगोठबाट सल्केको आगो फैलिएर सप्तरीको बोदे बसाईन नगरपालिका–७ बगबिरा टोलका ६ वटा घर जलेर खरानी भएको छ । 

गएराति भएको आगलागीमा ६ वटा घर जल्दा करिब १० लाख बराबरको क्षति भएको अनुमान गरिएको छ । 

स्थानीयवासी गेनी दासको गाईगोठमा लामखुट्टे धपाउन बालिएको घुरबाट राति १२ बजेतिर अचानक सल्किएको आगो तत्काल नियन्त्रणको उपाय हुन नसक्दा फैलिएर निजको दुई घरका साथै छिमेकी कारी दासको दुई घर, देवेन्द्र दासको एक घर र जोगेन्द्र दासको घुम्टी किराना पसल जलेर नष्ट भएको हो । 

null

आगो निभाउने क्रममा गेनी दासकी ४१ वर्षीया श्रीमति देवकुमारी दास घाइते भएको र उनको लहानस्थित सप्तऋषि नरसिंह होममा उपचार भइरहेको इलाका प्रहरी कार्यालय बोदे बर्साइनका प्रहरी नायब निरीक्षक प्रदीप सिंहले जानकारी दिए । 

आगलागीमा परी गेनी दासको गाई, भैँसी, बाख्रासमेत गरी आठ वटा पशुचौपाया जलेर मरेका छन् भने घरमा रहेका अन्नपात, लत्ताकपडा, फर्निचरलगायत सम्पूर्ण समान जलेर नष्ट भएको पीडितलाई उद्धृत गर्दै प्रहरी नायब निरीक्षक सिंहले बताए । 

घटनाको खबर पाएपछि पुगेको प्रहरी र स्थानीयवासीको मद्दतले एक घण्टाको प्रयासपछि आगो नियन्त्रणमा लिइएको थियो ।