नेकपा पार्टीभित्र वामदेव गौतमले घिनलाग्दो खेल खेलेः मुख्यमन्त्री गुरुङ

पुस ५, काठमाडौँ । सत्तारुढ दल नेपाल कम्युनिस्ट पार्टी (नेकपा) को स्थायी समितिको बैठक चलिरहेको छ । 

धुम्बाराहीस्थित पार्टी केन्द्रीय कार्यालयमा २९ मंसिरदेखि जारी नेकपा स्थायी समितिको बैठकमा असन्तुष्टि जनाउँदै वामदेव गाैतम लगायतका सदस्यहरुले प्रधानमन्त्री केपी शर्मा ओली र अध्यक्ष पुष्पकमल दाहालको व्यग्र आलोचना गरिरहेका छन् ।  

null

यसै क्रममा स्थायी समिति सदस्य एवम् गण्डकी प्रदेशका मुख्यमन्त्री पृथ्वी सुब्बा गुरुङले भने नेतृत्वलाई बचाउ गर्दै वामदेव गौतमको आलोचना गरेका छन् । 

बुधबार एक टीभी कार्यक्रममा बोल्दै गुरुङले बामदेव गौतमले पेश गरेको प्रतिवेदन र मागप्रति असन्तुष्टि जनाएका हुन् । उनले पार्टीभित्र बामदेवले घिनलाग्दो खेल खेलेको आरोप लगाए । उनले वामदेवको प्रतिवेदन, प्रतिवेदन नभइ विचार मात्रै भएको बताए ।  

अध्यक्षद्धय केपी शर्मा ओली र पुष्पकमल दाहाल ‘प्रचण्ड’ मिलेर नै पार्टी चलाईरहेको अवस्थामा एक जनालाई अध्यक्षमात्रै र अर्कोलाई प्रधानमन्त्रीको मात्रै जिम्मेवारी दिनुपर्छ भन्ने बामदेवको मागप्रति असन्तुष्टि जनाएका हुन् । 

वामदेवले ओलीलाई सघाएर राम्रो काम गरेको भएतापनि पार्टी एकता तथा पार्टीको सुधारमा कुनै महत्वपूर्ण भूमिका नखेलेको दाबी गरे । उनले एमाले र माओवादी केन्द्रलाई मिलाउनको लागि प्रधानमन्त्रीको ठूलो योगदान रहेको बताए । उनले ओली र प्रचण्डजी नमिलेको भए बामदेवले मिलाउन सक्नुहुन्थ्यो भन्दै प्रश्न गरे । 

वाम एकता गराउन वामदेवको महत्वपूर्ण भुमिका रहेको तर निर्णायक भूमिका नरहेको पनि गुरुङको जिकिर छ । 

नेकपा नेता वामदेव गौतमले शनिबारको पार्टी केन्द्रीय सचिवालयको बैठकमा फरक मतको प्रतिवेदन पेश गर्दै केपी शर्मा ओलीका लागि अध्यक्षको जिम्मेवारी सम्हाल्न अनुकूल नभएको बताउँदै अध्यक्षको एकल जिम्मेवारी अर्का अध्यक्ष पुष्पकमल दाहाल (प्रचण्ड) लाई दिन प्रस्ताव गरेका थिए । 

शनिबारको पार्टी केन्द्रीय सचिवालयको बैठकमा फरक मत प्रस्तुत गरेका गौतमले त्यही फरक मतमार्फत् ‘पार्टीलाई प्रभावकारी बनाउन एक व्यक्ति एक पद नीति लागू गरेर अर्का अध्यक्ष प्रचण्डलाई अध्यक्षको एकल जिम्मेवारी दिन’ माग गरेका हुन्। 

यता प्रधानमन्त्री केपी शर्मा ओलीले प्रधानमन्त्री तथा नेपाल कम्युनिस्ट पार्टी (नेकपा) का अध्यक्ष केपी शर्मा ओलीले नेकपाले दुई अध्यक्ष बनाएर विश्वभरका बुर्जुवालाई समेत चुनौती दिएको बताएका थिए । 

उनले वामदेवको मागमाथि ठट्यौली भाषामा जवाफ दिँदै ‘संविधानले मिल्दैन, नत्र दुईवटा प्रधानमन्त्री हुँदा राम्रो हुन्छ’ भनेका थिए । 

उनले सरकार र पार्टीकाविरुद्ध भयानक गलत प्रचार भइरहेको भन्दै त्यसले पार्टीलाई कुनै असर नगर्ने बताएका थिए ।