एकता टुंगोमा पुग्यो, अब एक वर्षभित्र महाधिवेशन: प्रचण्ड

बैशाख ९, काठमाडौं । सत्तारुढ दल नेपाल कम्युनिस्ट पार्टीका अध्यक्ष एवम् पूर्व प्रधानमन्त्री पुष्पकमल दाहाल (प्रचण्ड) ले निर्वाचनपछि भएको पार्टी एकता भाँड्नका लागि भएका भित्रि र बाहिरी षड्यन्त्रलाई परास्त गरी एकताको गाँठो फुकाएको बताएका छन् । 

सोमबार ७७ वटै जिल्लाका अध्यक्ष र सचिवहरुको घोषणा गर्न राजधानीमा आयोजित कार्यक्रममा अध्यक्ष दाहालले यस्तो बताएका हुन् । 

null

‘एकता सम्भवै हुँदैन र भइहाले पनि टिक्दैन भनेर भ्रम छरियो । कम्युनिस्टहरू मिले भने देश अधिनायकवाद र निरंकुशतातर्फ जाने खतरा हुन्छ भनेर पनि आशंका सिर्जना गरियो’, प्रचण्डले भने, ‘जिल्ला कमिटीको एकता भएपछि मिसन कमप्लिट भएको छ । जिल्ला कमिटी मै हाम्रो गाँठो परेको थियो। त्यो गाँठो फुक्यो । एकताको गाँठो फुकेको छ । फलामे ढोका फोरेर हामी अघि बढेका छौँ ।’ 

तत्कालीन एमाले र माओवादी केन्द्रबीच चुनावी गठबन्धन भएर निर्वाचन सम्पन्न भइसकेपछि एकता हुन नदिन षड्यन्त्रहरू भएको उनको दाबी छ । 

‘निर्वाचन सकेपछि पनि धेरै किसिमका कसरत नेपाल भित्र र बाहिर भए। तर नेपाली जनताको अगाडि हामीले जे संकल्प र प्रतिबद्धता व्यक्त गरेका थियौँ, त्यो मिसनमा अघि बढ्यौँ’, उनले भने । 

कार्यक्रममा पार्टी एकता आजैबाट टुंगोमा पुगेको स्पष्ट पार्दै अध्यक्ष प्रचण्डले आठ महिनाभित्र तल्ला सबै कमिटीका र एक वर्षभित्र पार्टीको महाधिवेसन सम्पन्न गर्ने बताए। 

प्रचण्डले एकता प्रक्रिया सोचेजस्तो तीब्र गतिमा हुन नसकेको तथा एकतामा ढिलाइ भएकोमा पार्टी कार्यकर्ताहरूसँग क्षमा माग्दै बधाई पनि दिए ।