प्रधानमन्त्री ओलीद्वारा श्रीलंकाकाे घटनाप्रति खेद प्रकट

बैशाख ८, काठमाडाैँ । श्रीलंकामा भएको आत्मघाती बम विस्फोटको घटना प्रति प्रधानमन्त्री केपी शर्मा ओलीले सन्देश मार्फत खेद प्रकट गरेका छन् । 

प्रधानमन्त्री ओलीले आज श्रीलंकाका प्रधानमन्त्री रनिल विक्रमासिंघेलाई एक समवेदना पत्र पठाउँदै त्यस दुःखद घटनाप्रति खेद प्रकट गरेका हुन् । श्रीलंकामा बम विस्फोटमा परी हाल सम्म मृत्यु हुनेको संख्या १ सय ५६ पुगि सकेको छ भने घाईतेको संख्या ४ सय भन्दा बढी रहेको छ । 

null

प्रधानमन्त्री ओलीले समवेदना पत्रमा लेखेका छन् ‘आइतबार बिहान श्रीलंकाका विभिन्न सार्वजनिक स्थानहरुमा भएको श्रृंखलावद्ध वम आक्रमणमा परी कैयौं निर्दोषहरुले जीवन गुमाउनु परेको घटनाले मलाई अत्यन्त दुःखी बनाएको छ।’ 

उनले लेखेको पत्रमा नेपाल सरकारले मानवता विरोधी जघन्य घटनाको भत्सर्ना गरेको उल्लेख समेत गरेका छन् । उनले पठाइएकाे पत्रमा लेखिएको छ ‘यस्तो आपराधिक घटनामा संलग्न अपराधीहरुलाई सकेसम्म चाँडै कानुनको दायरामा ल्याइनेछ भन्ने कुरामा म विश्वस्त छु। नेपाल आतंकवाद विरुद्धको आफ्नो सैद्धान्तिक अडानमै उभिएर कुनै पनि रंग र रुपको आतंकवादको कडा शब्दमा निन्दा गर्दछ ।’ 

यस घटनामा ज्यान गुमाउने प्रति प्रधानमन्त्री ओलीले नेपाल सरकार र सम्पूर्ण नेपाली जनताको तर्फबाट श्रद्धाञ्जली व्यक्त गर्दै शोकाकुल परिवारजनप्रति समवेदना प्रकट गरेका छन् ।