ल्याण्डफिल्ड साइट नहुँदा बस्ती नजिकै फोहोरमैला, स्थानीयलाई सास्ती

जेठ ६, तनहुँ । तनहुँको भिमाद नगरपालिकामा ल्याण्डफिल्ड लाइटको अभावमा बस्ती नजिकै फोहरमैला फालिँदा स्थानीयवासी मर्कामा परेका छन् । 

भिमाद बजारमा सङ्कलित फोहरमैला भिमाद नगरपालिका र म्याग्दे गाउँपालिकाको सिमानास्थित सेती नदीको तिरमा फालिँदा स्थानीयवासी मर्कामा परेका हुन् । 

null

स्थानीयवासी एकबहादुर रानाले फोहर जलाएको धुवाँ र दुर्गन्धले गर्दा यहाँका स्थानीयवासीलाई सास्ती भएको बताए । 

उनले भने, “नदी छेउमा खुलारुपमा फालिएको फोहरले वातावरणलाई प्रदूषित बनाएको त छ नै, फोहरलाई व्यवस्थापन गर्न गलत तरिका अपनाएर आगो लगाई दिँदा दुर्गन्धले बस्तीमा बसि नसक्नुभएको छ ।” 

भिमाद नगरपालिकाले स्थापना भएको दुई वर्ष बितिसक्दा पनि फोहर फाल्ने उचित ठाउँको व्यवस्थापन गर्न सकेको छैन । 

अव्यवस्थित तवरले नदी छेउमा खुलारुपमा फोहर फ्याँक्ने गरिएको छ । नदी छेउमा फ्याँकिएको फोहरलाई खाडलमा पुरेर व्यवस्थापन गर्नुको सट्टा जलाउने गर्दा धुवाँको मुस्लो र दुर्गन्धले स्थानीयवासी हैरान भएका छन् । 

नगरपालिकाले फोहर व्यवस्थापन गर्ने जिम्मा तनहुँ उद्योग वाणिज्य सङ्घ भिमाद बजार एकाइलाई दिइएको छ । 

एकाइ सभापति चतुर्भुज सुवेदीले भने व्यवस्थित तरिकाले नै फोहरको डम्पिङ गर्ने गरेको बताए । 

उनले भने, “बजारमा सङ्कलित फोहरलाई सेतीको तिरमा लगेर पुर्ने गरेका छौँ । कवाडी सङ्कलन गर्नेले आगो लगाइदिने गरेका रहेछन् ।” 

उनका अनुसार फोहर फाल्न उक्त ठाउँलाई छनोट गर्दा बस्ती थिएन । अहिले बस्ती बाक्लिदै गएपछि स्थानीयवासी प्रभावित भएको आफूहरुले पनि महसुस गरेको उनले जानकारी दिए । उनका अनुसार फोहर फाल्नलाई वैकल्पिक स्थानको खोजी भइरहेको छ । 

भिमाद नगरपालिकाका प्रमुख प्रशासकीय अधिकृत थमनसिंह थापाले फोहर व्यवस्थापन गर्न ल्याण्डफिल्ड साइट निर्माण गर्न जग्गाको खोजी गरिएको बताए । रासस