विमानस्थलमा आधा घन्टा उडान-अवतरण ठप्प हुने

जेठ १, काठमाडौं । प्रधानमन्त्री केपी शर्मा ओली भियतनाम र कम्बोडियाको एकसाता लामो भ्रमण सकाएर आज स्वदेश फर्कँदै छन् । 

प्रम ओली आज (बुधबार) साँझ ७ बजेर ५ मिनेटमा नेपाल एयरलाइन्सको ‘एयरबस ९३२०’ मार्फत् काठमाडौं आउन लागेका हुन् । 

null

प्रधानमन्त्रीको स्वदेश फिर्तीसँगै हवाई क्षेत्र प्रभावित हुने भएको छ । प्रधानमन्त्री ओलीसहितको विमान अवतरणलाई लिएर ३० मिनेट आन्तरिक तथा अन्तर्राष्ट्रिय उडान तथा अवतरण पूर्णरुपमा ठप्प हुनेछ । स्वदेश फिर्ती हुने समय भन्दा १५ मिनेट अगाडी नै सबै उडान तथा अवतरण बन्द हुने विमानस्थल कार्यालयले जनाएको छ । 

समाजवादी गणतन्त्र भियतनामका प्रधानमन्त्री गुएन सुआन फुकको निमन्त्रणमा २६ वैशाखमा भियतनाम प्रस्थान गरेका प्रधानमन्त्री ओलीले ३० वैशाख सम्म भियतनाम र ३० वैशाख देखि १ जेठ सम्म कम्बोडियाको औपचारिक भ्रमण गरेका हुन् । 

भ्रमणका क्रममा नेपाल–भियतनाम हवाई सम्झौता भएको थियो भने कम्बोडियासँग व्यापार विस्तारको समझदारी भएको थियो । 

भियतनाम भ्रमणमा बुद्ध सन्देशको सान्दर्भिकताबारे विश्व समुदायलाई जानकारी दिएको उनले बताएका थिए । कूटनीतिक र आर्थिक हिसाबले भियतनाम, कम्बोडिया भ्रमण फलदायी भएको उनको दाबी छ । 

भ्रमण दलमा प्रधानमन्त्रीकी धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली, प्रधानमन्त्रीका प्रमुख सल्लाहकार विष्णुप्रसाद रिमाल, परराष्ट्र सल्लाहकार डा। राजन भट्टराई, सङ्घीय संसद् अन्तरराष्ट्रिय सम्बन्ध समितिका सभापति पवित्रा निरौला, सांसद् लगायत संलग्न छन्।