राष्ट्रिय वाणिज्य बैंकलाई अर्थमन्त्रीको सुझावः बचतकर्तालाई अन्याय नगराैँ

भदौ ११, काठमाडौं । अर्थमन्त्री डा. युवराज खतिवडाले बचतकर्तालाई मारमा नपार्न बैंकहरुलाई सुझाव दिएका छन् ।   

बुधबार राष्ट्रिय वाणिज्य बैंकको डिजिटल प्रविधिबाट एकै पटक १४ शाखा कार्यालयहरुको उद्घाटन गर्दै अर्थमन्त्री खतिवडाले बचतकर्ताहरुलाई अन्याय नगर्न बैंकलाई सुझाव दिएका हुन् । बचतकर्तालाई मारमा पारे एक दिन बैंकहरु एकदमै पीडामा पुग्ने उनको भनाइ छ ।   

‘साढे ५ प्रतिशत बेस रेट तपाईँहरुले राखेपछि त बिचरा हाम्रा निक्षेपकर्ताहरुको त के बेहाल भएको होला भन्ने अनुमान गर्न सकिन्छ । जुनबेला अरु बैंकको औषत ब्याजदर ९, १०, ११ प्रतिशत छ । बेस रेट नै अहिले १० भन्दा अलि तल आएको होला । तपाईँहरु ५ मा हुनुहुन्छ भनेपछि मैँले खुशी मनाउने कि दुःख मनाउने’, कार्यक्रममा उनले भने, ‘नेपाल सरकारको खाता सञ्चालन, दातृ निकायको खाता सञ्चालन, चल्ती खाताको मात्रै कम्पोजिसनको कुरा म केही हदसम्म बुझ्न सक्छु । तर बचत खातालाई अन्याय नगर्नुस् ।’ 

पहिलेको तुलनामा राष्ट्रिय वाणिज्य बैंकले प्रगति गरेको चर्चा गर्दै अर्थमन्त्री खतिवडाले विकट ठाउँमा पनि सेवा दिनु बैंकको सकारात्मक पक्ष रहेको बताए । प्राथमिकता क्षेत्र तोकेर लगानी गर्नुपर्ने तथा वित्तिय पहुँचका लागि वित्तिय साक्षरता अभियानलाई बैंकले अगाडी बढाउनुपर्नेमा उनको जोड थियो ।   

मुद्रा स्फिीर्ति दर ५ प्रतिशत भन्दा कम भएको अहिलेको अवस्थामा बचतकर्तालाई त्यसको वरिपरिको ब्याज दिन बैंकहरु तयार हुनुपर्ने उनले स्पष्ट पारे । ‘नेपालको पुँजी त्यति सस्तो पनि छैन कि यति कम ब्याजमा पैसा बचत पनि होस्, र एकै अंकमा कर्जा लगानी पनि होस् । बैंकहरुले आफ्नो स्वायत्तताभित्रको जवाफदेहिता र जिम्मेवारी पालना गरेर अघि बढ्नुपर्छ’, मन्त्री खतिवडाले भने ।  

अहिले मुलुकमा आर्थिक क्रियाकलापहरु शिथिल हुन लाग्यो, व्यवासायीमा उत्साह छैनन् भन्ने टिप्पणीहरु आइरहेको उल्लेख गर्दै उनले भने, ‘व्यवसायीमा उत्साह छैन भन्ने टिप्पणीहरु आइरहेका छन् । उहाँहरुलाई म भन्न चाहन्छु । बैंकहरुमा ऋणको यति धेरै माग छ कि, खुरुखुरु लगानी गर्न पाउने र स्रोत भइरहने हो भने दुई वर्षको माग त अहिले नै सिर्जना भइसकेको छ । यतिधेरै उद्योगहरु दर्ता भएका छन्, देश विदेशबाट कम्पनीहरु आउन खोजिरहेका छन् ।’