रवि लामिछाने फेरि ५ दिन हिरासतमै
![](https://www.makalukhabar.com/wp-content/uploads/2023/10/Final-icon-Logo-2023.png)
![](https://www.makalukhabar.com/wp-content/uploads/2021/01/nophoto.png)
भदौ ३, काठमाडौं । न्युज २४ टेलिभिजनका पत्रकार रवि लामिछानेलाई थप ५ दिन हिरासतमै राखिने भएको छ ।
स्व. पत्रकार शालिकराम पुडासैनी आत्महत्या प्रकरणमा चितवन जिल्ला अदालतले मंगलबार उनीसहित ३ जनालाई थप ५ दिनको म्याद थपेर अनुसन्धान अघि बढाउन अनुमति दिएको हो ।
जिल्ला न्यायधीश गायत्रीप्रसाद रेग्मीको एकल इजलासले लामिछानेसहित तीनै जनालाई हिरासतमा राखेर अनुसन्धान गर्न आदेश दिएको हो ।
गएको बिहीबार रविसहित युवराज कँडेल र अस्मिता कार्की पक्राउ परेका थिए । साउन ३१ गते पनि उनीहरुलाई ५ दिन म्याद दिएर अनुसन्धान गर्न अनुमति दिइएको थियो ।
गत साउन २० गते चितवनको नारायणगढमा एक होटलमा पत्रकार पुडाशैनी झुन्डिएको अवस्थामा मृत फेला परेका थिए । पुडाशैनीले आत्महत्या गर्नुअघि रेकर्ड गरिएको भिडियोमा लामिछाने, कँडेल र कार्कीका कारण आत्महत्या गर्नु परेको उल्लेख भएपछि प्रहरीले अनुसन्धानका लागि तीनै जनालाई पक्राउ गरि अनुसन्धान गरिरहेको छ ।
पुडाशैनीले आत्महत्या गरेको पोष्ट मार्टम रिपोर्टले समेत पुष्टि गरिसकेको छ । लामिछाने पक्राउ निर्दोष रहेको दावी गर्दै उनका समर्थकहरुले उनी पक्राउ गरेको दिनदेखि चितवनमा प्रर्दशन गरिरहेका छन् ।
प्रर्दशन उग्र बन्दै गएपछि भरतपुरको चौविसकोठीदेखि मालपोत चोकसम्म निषेधित क्षेत्र घोषणा गरिएको छ ।
![](https://www.makalukhabar.com/wp-content/uploads/2023/10/Final-icon-Logo-2023.png)