राष्ट्रिय संगीतकर्मी संघले पर्यटन वर्ष–२०२० लाई लक्षित गरि कोरियामा सांस्कृतिक कार्यक्रम आयोजना गर्ने

भाद्र २६ , काठमाडौं । राष्ट्रिय संगीतकर्मी संघले पर्यटन वर्ष–२०२० लाई लक्षित गरि कोरियामा सांस्कृतिक कार्यक्रम आयोजना गर्ने भएको  छ । संघले कोरियामा सेप्टेम्बर १५–१६ नेपाल सांस्कृतिक महामेला आयोजना गर्न लागिएको हिजो रिपोर्टर्स क्लबमा पत्रकार सम्मेलन गरेर जानकारी गराएको हो ।   

“भिजिट नेपाल–२०२०” लाई लक्षित गरेर उक्त कार्यक्रम कोरियाको राजधानी सेओलमा गर्न लागिएको आयोजकको भनाई छ । संघकाअनुसार उक्त कार्यक्रम नेपाल र कोरियाको सांस्कृतिक झल्काउने हिसाबले गर्न लागिएको छ । संघका अध्यक्ष राजेन्द्र कुमार कार्कीले सरकारद्वारा घोषणा गरिएको नेपाल भ्रमण वर्ष–२०२० लाई भव्य रुपमा सफल तुल्याउन सम्पूर्ण संगितकर्मी र मिडिया जगतले साथ दिनुपर्ने र यो दायित्व पनि भएको बताए ।   

उक्त कार्यक्रमलाई लिएर सामाजिक सञ्जालमा धेरै टिकाटिप्पणीहरु भएका छन् । उक्त कुराहरु गलत भएको र संघलगायत सम्पूर्ण कलाकारहरुले आफ्नो व्यक्तिगत खर्च गरेर कार्यक्रममा संलग्न हुन लागेको स्पष्ट पारिएको थियो । राज्यलाई कुनैपनि घाटा नलगाई निःस्वार्थ भावनाले कार्यक्रम सञ्चालन गर्न लागिएको आयोजकको दाबी छ ।   

कार्यक्रममा कोरियाका ख्यातिप्राप्त कलाकारहरुको सहभागिता रहने आयोजकले जनाएको छ । त्यस्तै, कोरियामा बस्ने नेपालीहरुलाई उक्त कार्यक्रममा सहभागी हुन आयोजकले अनुरोध गरेको छ । उक्त महामेलाको लागि दुई दर्जनभन्दा बढि कलाकारहरु कोरिया जाने भएका छन् । नेपालमा २० लाखभन्दा बढी पर्यटकहरु भित्र्याउने उद्देश्यले यो कार्यक्रम सञ्चालन गर्न लागिएको छ । कोरियामात्र नभई अमेरिका र क्यानडाजस्ता अरु थुप्रै देशहरुमा पनि संघले यस्तै खालको सांगीतिक कार्यक्रम सञ्चालन गर्ने जनाएको छ ।   

कार्यक्रममा बोल्दै वरिष्ठ गायक यम बरालले आफूहरु गर्वसाथ कार्यक्रममा भाग लिन जाने र कार्यक्रम सम्पन्न भएपछि गर्वसाथ नै फर्केर आउने विश्वास दिलाए । कार्यक्रममा कोरियन कलाकार र नेपाली कलाकारहरुको उपस्थिति रहनेछ भने  कोरिया र नेपालका विभिन्न संस्कृति झल्किने वभिन्न किसिमका गीतहरु प्रस्तुत गरिने छन् । कार्यक्रमको मुनाफा अनाथ बालबालिकालाई खर्चिने पनि आयोजकले जनाएको छ ।   

उक्त कार्यक्रममा चर्चित गायक यम बराल, कलाकारहरु क्रमशः सुलेमान “इकु”, प्रकाश कटुवाल, आस्था राउत, राजेन्द्र कुमार कार्की, अमृत खाती, सिर्जु अधिकारी, प्रकाश दास, रवी ओड, नवराज ढुङ्गाना, उमा श्रेष्ठ, सन्ध्या सानु, सृजना खनाल, कुमार कार्की, डिवी लोप्चन, शान्त शिशीर, राम थापा शिशीर, राज कुमार हुमागाँई, श्रीदेवी देवकोटालगायतको उपस्थिति रहनेछ ।