राष्ट्रपतिको आलोचना गरेको अडियो सार्वजनिक भएपछि युक्रेनका प्रधानमन्त्रीले दिए राजीनामा

माघ ३, काठमाडौं । युक्रेनका प्रधानमन्त्री ओलेक्सी गोन चारूकले शुक्रबार पदबाट राजीनामाको घोषणा गरेका छन् ।   

राष्ट्रपति भोलोडोम्यर जेलेन्स्कीको आलोचना गरेको अडियो रेकर्ड सार्वजनिक भएपछि उनले राजीनामाको घोषणा गरेका हुन् । उनले अडियोमा आर्थिक विषयलाई लिएर राष्ट्रपतिको आलोचना गरेको अन्तर्राष्ट्रिय सञ्चारमाध्यमहरुले जनाएका छन् । 

‘हाम्रो विवाद थियो, त्यसले थप बहस नहोस भन्ने उद्धेश्यसँगै राष्ट्रपति प्रतिको विश्वास र सम्मानका लागि मैले राजीनामा दिने घोषणा गरेको हुँ,’ ३५ वर्षीय प्रधानमन्त्री ओलेक्सीले आफ्नो आधिकारीक फेसवुक पेजमा लेखेका छन् । 

सार्वजनिक भएको अडियो बनावटी भएको र राष्ट्रपतिप्रति आफ्नो सम्मान गिराउने नियतले बनाएर सार्वजनिक गरिएको आरोप पनि लगाएका छन् । ‘त्यो अडियो सत्य होईन,’ उनले भनेका छन् ।  उनी सन् २०१९ अगस्तबाट प्रधानमन्त्रीको पद  सम्हालेका थिए । –एजेन्सी