१२२ चिनियाँलाई देश निकाला गर्ने प्रहरीको तयारी
पुस २०, काठमाडौं । पुसको दोस्रो साता पक्राउ परेका १२२ चिनियाँ नागरिकहरुलाई देश निकाला गर्ने तयारी गरिएको छ ।
प्रहरीले चीनकै सुरक्षा एजेन्सीको सहयोगमा देशका विभिन्न ९ स्थानबाट पक्राउ परेका उनीहरुलाई देश निकाला गर्ने तयारी गरेको हो ।
वैधानिक प्रक्रियाबाट स्वदेश लैजान समस्या आउने भएपछि देश निकाला गर्ने तयारी गरिएको प्रहरी स्रोतले जानकारी दिएको छ । उनीहरुको राहदानी खारेज हुनेछ । त्यसपछि उनीहरु अवैध हुनेछन् । अवैध भएपछि देश निकाला गर्ने बाटो खुल्ने र चीन पठाउन सहज हुने देखिएपछि प्रहरीले चीनकै आग्रहमा यो मार्ग अपनाएको हो ।
पक्राउ परेका सबै चिनियाँ पर्यटक भिसामा नेपाल आएको खुलेको छ । प्रहरीले चीनमा गम्भीर अपराधमा संलग्न भएको आरोपमा उनीहरुलाई पक्राउ गरेको बताएको थियो ।
पक्राउ परेका सबैलाई परिसर, सोह्रखुट्टे, सिंहदरबार, बालाजु, महाराजगन्ज वृत्तमा राखि अभद्र व्यवहारमा सामान्य मुद्दा चलाइएको थियाे ।
एक हजार रुपैयाँ जरिवाना तिरेर छुटे
पक्राउ परेका चिनियाँ नागरिकहरु आज (आइतबार) छुटेका छन् । जिल्ला प्रशासन कार्यालय, काठमाडौंले आइतबार जरिवाना तिराएर उनीहरुलाई छाड्न आदेश दिएको हो ।
चिनियाँ नागरिकको कुनै कसूर नभेटेको भन्दै अभद्र व्यवहारसम्बन्धी मुद्दामा अनुसन्धानको प्रतिवेदन जिल्ला सरकारी वकिल कार्यालयमा बुझाएको थियो ।
सरकारी वकिलको रायअनुसार चिनियाँ नागरिकले कसूर स्वीकारेकाले एक हजार रुपैयाँ जरिवाना गराउने आदेश दिइएको हो ।
अभद्र व्यवहारसम्बन्धी कसूरमा १० हजार रुपैयाँसम्म जरिवाना हुन सक्ने कानूनी व्यवस्था छ ।
कसरी पक्राउ परेका थिए चिनियाँ नागरिक
चिनियाँ नागरिकहरु अवैध गतिविधिमा संलग्न भएको आशंकामा प्रहरीले काठमाडौंमा चलाएको ‘सर्च एण्ड एरेष्ट’ अपरेशनका क्रममा पुस ७ गते १२२ जना चिनियाँ नागरिकलाई नियन्त्रणमा लिएको थियो ।
केन्द्रीय अनुसन्धान ब्युरो (सीआईबी) र काठमाडौं प्रहरी परिसर, टेकुले काठमाडौंको मनमैजु, महाराजगञ्ज र बुढानीलकण्ठ क्षेत्रबाट संयुक्त अपरेशन चलाएको थियो । त्यसक्रममा चिनियाँ नागरिकहरू भिसा अवधि सकिसक्दा पनि अबैध रुपमा बसेको, आइटी, होटल लगायतका क्षेत्रमा काम गर्ने गरेको पाइएको हो ।
प्रहरीले उनीहरुको साथबाट ठूलो संख्यामा ल्यापटप र मोबाइल बरामद गरेको थियो ।