अमेरिकाका सबै राज्यमा कोरोना, १०९ जनाको मृत्यु

चैत ५, काठमाडौं । कोरोना भाइरसको संक्रमण अमेरिकाको ५० वटै राज्यमा फैलिएको छ । विश्वभर महामारीको रुप लिएको कोरोना अमेरिकामा पनि तीव्र गतिमा फैलिएको हो ।   

पछिल्लो रिपोर्टअनुसार वेस्ट भर्जिनिया राज्यमा पनि कोरोनाको संक्रमण देखिएसँगै अमेरिकाका सबै राज्यमा कोरोना पुगेको हो । अमेरिकामा पछिल्लो २४ घन्टामा २३ जनाको मृत्यु भएको छ भने १७ सय ९३ जना थप संक्रमित भएका छन् ।  

योसँगै अमेरिकामा कोरोनाबाट मृत्यु हुनेको संख्या १०९ पुगेको छ भने कुल संक्रमितको संख्या ६ हजार ४ सय ५६ पुगेको छ । अमेरिकामा सबैभन्दा धेरै वाशिंटन राज्यमा ५४ जनाको मृत्यु भएको छ भने क्यालिफोर्निया र न्युयोर्कमा १२-१२ जनाको मृत्यु भएको छ ।