नागढुङ्गाबाट अनावश्यक सवारी साधन पूर्णरुपमा निषेध, नक्कली बिरामी र एम्बुलेन्स प्रहरी नियन्त्रण

रोशन दानी/

काठमाडौं । नागढुंगा नाकामा प्रहरीले थप कडाई गरेको छ । लकडाउनमा अनावश्यक हिड्डुल गर्ने, सवारी पासको दुरुपयोग गर्ने, स्थानिय तहको सिफारिस बनाई सवारी साधन चलाउने भेटिए पछि नाकाहरूमा थप कडाइ गरि फर्काउने काम भईरहेको हो ।

आजै मात्र विभिन्न जिल्लाबाट नागढुंगा नाका आइपुगेका मोटरसाइकलसहितका ५४ वटा सवारीसाधनलाई प्रहरीले फर्काइदिएको छ ।

सवारी पास भए पनि विना समन्वय र अत्यावश्यक कामविना आएका उनीहरुलाई फर्काइदिएको प्रहरीले जनाएको छ ।

गृह मन्त्रालयका उप–सचिव उमाकान्त अधिकारीले प्रहरीले नागढुंगामा चेकजाँचमा कडाइ गरेको पाइएको बताए ।

बुधबार निरीक्षणका क्रममा नागढुंगा पुगेका उनले भने, ‘अत्यावश्यक बाहेकका सवारीसाधनको आवतजावतलाई पूर्णतः निषेध गर्ने गृह मन्त्रालयको नीति छ । त्यसअनुसार फिल्डमा पनि कार्यान्वयन भइरहेको पाएका छौं ।’

अधिकारीका अनुसार अत्यावश्यक अवस्थाका लागि पास चाहिए जिल्लाको प्रशासनसँग पनि समन्वय गर्न भनिएको छ । उनका अनुसार गृहको निर्देशनपछि नाकामा सवारीसाधन र व्यक्तिको ‘मुभमेन्ट’ पातलिएको छ । यद्यपि, एम्बुलेन्समा पनि विरामी नभएका व्यक्तिलाई हालेर ल्याउने गरेको पाइएको उनले बताए ।

अधिकारीले भने, ‘त्यस्ता व्यक्तिलाई प्रचलित ऐनअनुसार कडा कारबाही हुन्छ ।’

नागढुंगा नाकाको अनुगमनका लागि अधिकारीसहित उपत्यका प्रहरी प्रमुख डीआईजी विश्वराज पोखरेलले लकडाउन पुनः पालना गराउन थप कडाइका साथ काम भईरहेको बताए । राजधानी भित्रने सवारी साधनहरूलाई कडा निगरानीका साथ हरिरहेको बताउदै अनावश्यक सवारी साधनको मोविलिटिलाई पूर्णरुपमा निषेध गरिदै आएको उनको भनाई छ । निरिक्षणमा सशस्त्र प्रहरीको उपत्यका प्रमुख डीआईजी चन्द्रप्रसाद गौतम,  काठमाडौं प्रहरी प्रमुख एसएसपी श्यामलाल ज्ञवाली, राष्ट्रिय अनुसन्धान विभागका अधिकृतलगायत नागढुंगा पुगेका थिए ।