वीपी प्रतिष्ठानमा भोलीबाट ओपीडी सुचारु हुँदै, सामान्य विरामी रिफर नगर्न आग्रह

धरान । वीपी कोइराला स्वास्थ्य विज्ञान प्रतिष्ठानले भोलीबाट ओपीडी सेवा सुचारु गर्ने भएको छ । कोरोना भाइरस संक्रमण जोखिमका कारण बन्द भएको प्रतिष्ठानको जनरल ओपीडी सेवा भोलीबाट सतर्कताका साथ सञ्चालन गर्ने प्रतिष्ठानले जनाएको छ ।

संक्रमण एक अर्कामा नफैलियोस भनेर प्रतिष्ठानले सामाजिक दुरी कायम राख्दै ओपीडी शुरु गर्ने भएको प्रतिष्ठानका अस्पताल निर्देशक डा. गौरीशंकर शाहले बताएका छन् ।

शाहका अनुसार भोलीबाट शुरु हुने ओपीडीमा आउने सेवाग्राहीलाई प्रतिष्ठानको मेन गेटबाटै टोकन वितरण गरिनेछ । सोहि टोकनका आधारमा विरामी दर्ता गरी ओपीडी कार्य उपलब्ध गराईनेछ । प्रत्येक विरामी र भिजिटरले प्रतिष्ठान प्रवेश गर्दा अनिवार्य मास्कको प्रयोग गर्नुपर्ने छ ।

प्रतिष्ठानका उपकुलपति प्रा.डा. ज्ञानेन्द्र गिरीले प्रतिष्ठानमा आएका विरामी तथा उपचारमा संलग्न कसैलाई जोखिम नहुने गरी ओपीडी सुचारु गरिने बताए । ‘कोरोना महामारीबाट कसरी सुरक्षित रहने सम्पूर्ण सावधानी अपनाएर ओपीडी सुरु गर्न लागिएको हो ।’ उनले भने ।

प्रतिष्ठानका चिकित्सक, कर्मचारीको स्वास्थ्य सुरक्षाको सम्पूर्ण प्रबन्ध मिलाएर ओपीडी सञ्चालन गर्न लागिएको डा. गिरीको दावि छ । ‘यो निर्णय सम्पूर्ण विभागीय प्रमुख, चिकित्सक तथा कर्मचारीहरु सँगको छलफलबाट गरीएको हो ।’ उनले भने ।–‘प्रत्येक डिपार्टमेन्टले भने अनुसार सुरक्षा सामग्रीहरु उपलब्ध गराइएको छ । धेरै जोखिम भएका ठाउँमा पिपिई लगाएर हेर्ने, कम जोखिम भएका स्थानमा पनि मास्क, पञ्जा तथा अन्य सुरक्षाका सामग्री लगाएर मात्र विरामी जाँच्न भनिएको छ ।’

प्रतिष्ठानले ओपिडी मात्र हैन अस्पतालका अन्य सेवाहरु क्रमिक रुपमा सुचारु गर्ने रणनीति अपनाएको छ ।

उपकुलपतिले आज प्रतिष्ठानमा भर्ना भएकी महिलालाई कोरोना संक्रमित नर्सले रिफर गरेको पाइएपछि उनको उपचारमा संलग्न चिकित्सक तथा प्रतिष्ठानमा उनीसँग सम्पर्कमा आएका सबैको कोरोना परीक्षण भएको बताए । ‘पिसिआरको रिपोर्ट नआउञ्जेल सेवाहरु बन्द गरीएको हो । ११, १२ बजेसम्म रिपोर्ट आउँछ । रिजल्ट नेगेटिभ आए सबै सेवा सुचारु हुन्छ । पोजेटिभ आएपनि सबैलाई कोभिड अस्पतालमा राखेर उपचार हुन्छ ।’ डा. गिरीले भने ।

सामान्य विरामी रिफर नगर्न आग्रह

अहिले देशभरका स्वास्थ्य संस्थाहरुले ओपीडी समेत बन्द गरेर विरामी उपचार नगरेर रिफर गर्ने क्रम बढेकोले त्यसको प्रत्यक्ष असर वीपी प्रतिष्ठानलाई परेको छ ।

प्रदेश १ सँगै प्रदेश २ का जनकपुर, सप्तरी, सिराहाबाट समेत विरामी प्रतिष्ठानमा विरामी रेफर गर्नाले प्रतिष्ठानमा चाप बढेको छ । यसरी सामान्य प्रकारका विरामी समेत प्रतिष्ठान आउँदा गम्भिर प्रकारका विरामीको उपचारमा असर परेकोले प्रतिष्ठानले अत्यावश्यक वाहेकका विरामी रिफर नगर्न अनुरोध गरेको छ ।

‘अहिले १ नं. प्रदेशबाट मात्र हैन २ नम्बर प्रदेशका सप्तरी, जनकपुरबाट समेत अननेसेसरी विरामी रिफर भएका छन् । सामान्य प्रकारका विरामी रिफर नगरौं, सबैले आ–आफ्नो दायीत्व निर्वाह गरौं ।’ डा. गिरीले भने । उनले सामान्य विरामी रिफर नगर्न प्रदेश सरकारका मुख्यमन्त्री, स्वास्थ्यमन्त्री सम्मलाई अनुरोध गरीएको पनि जनाए ।