विराटनगर महानगरपालिकाको ३ अर्ब बढीको बजेट सार्वजनिक
मकालु खबर
- सुजाता लिम्बु
विराटनगर । विरानगर महानगरपालिकाले आगामी आर्थिक वर्ष २०७७/०७८ को आय–व्यय विवरण सार्वजनिक गरेको छ ।
महानगरपालिकाको छैठौं नगरसभामा उप–प्रमुख इन्दिरा कार्कीले बुधबार आय-व्यय विवरण सार्वजनिक गरेकी हुन् । उप–प्रमुख कार्कीले ३ अर्ब ३७ करोड ८१ लख १० हजार रुपैयाँको आय–व्यय विवरण सार्वजनिक गरेकी हुन् ।
उल्लेखित अनुमानित बजेटमध्ये महानगरपालिकाले आन्तरिक स्रोतबाट ८९ करोड ८२ लाख १६ हजार ७ सय, संघीय तथा प्रदेश सरकारबाट प्राप्त हुने राजस्व बाँडफाँडबाट ७६ करोड ८२ लाख ५२ हजार ९ सय ४० र संघिय तथा प्रदेश सरकारबाट प्राप्त हुने वित्तिय समानीकरण अनुदानबाट ३८ करोड ७ लाख ६८ हजार प्राप्त गर्ने अनुमान गरेको छ ।
उप–प्रमुख कार्कीको अनुसार महानगरद्धारा सङ्घीय सरकार सशर्त अनुदानबाट १ अर्ब २ करोड ९ लाख, प्रदेश सरकार सशर्त अनुदानबाट २ करोड १० लाख ९ हजार १ सय ८०, सङ्घीय सरकार बिशेष अनुदानबाट १३ करोड, प्रदेश सरकार समपूरक अनुदानबाट ३ करोड, वैदेशिक तथा अन्य संघसंस्थाको अनुदानबाट ३ करोेड २६ लाख ७८ हजार १ सय ८० र जनसहभागिताबाट ९ करोड ६२ लाख ५ हजार रुँपैया आर्जन हुने अनुमान गरिएको छ ।
उप–प्रमुख कार्कीले प्रस्तुत गरेको बजेटमा महानगरपालिको प्रशासनिक खर्च तर्फ ३४ करोड १९ लाख ५० हजार, सामाजिक सुरक्षा तर्फ ३६ करोड र ल्याडफिल्डको जग्गा खरिद सहित वातावरण तथा फोहोरमैला व्यवस्थापन तर्फ ११ करोड ४९ हजार ५० हजार रुँपैया बराबरको बजेट विनियोजन गरिएको छ ।
त्यस्तै नगर स्वास्थ्य तर्फ १९ करोड ५७ लाख ९५ हजार, शैक्षिक विकास कार्यक्रम तर्फ ५६ करोड १३ लाख ५ हजार, महिला बालबालिका एवं युवा विकास तथा खेलकुद तर्फ २ करोड ९ लाख २४ हजार र भौतिक पुर्वाधार निमार्ण लगायतका अन्य पुँजीगत खर्च तर्फ १ अर्ब ७१ करोड ७९ लाख ६५ हजार रुँपैया बराबरको बजेट विनियोजन गरिएको उप–प्रमुख कार्कीले जानकारी दिइन् ।
मकालु खबर
