सरिता गिरीको ठाउँमा लीला सिटौला !

काठमाडौं । समाजवादी पार्टीले सांसद सरिता गिरीलाई कारवाही गरेपछि उनको ठाउँमा लीला सिटौलालाई ल्याउने तयारी गरेको छ । समाजवादी पार्टीबाट खस आर्य महिलाको कोटामा समानुपातिक सांसद बनेकी गिरीकाे पदमा उनलाई ल्याउन लागिएकाे हाे ।

समानुपातिक सांसद पदमुक्त भएपश्चात् बन्द सूचीमा रहेको रोलक्रमका आधारमा नियुक्त गर्न पाउने कानुनी व्यवस्था छ । अब गिरीकाे सांसद पद समाप्तिसँगै बन्दसूचीमा उनीभन्दा मुनि रहेकी लीला सिटौला स्वतः सांसद बन्न बाटाे खुल्नेछ ।

सांसद गिरीले जेठ २७ गते लिपुलेक, लिम्पियाधुरा समेटिएको नेपालको नक्सा सहितको निसान छाप बदल्नका लागि भएको संविधान संशोधन मतदानमा पार्टीले जारी गरेको ह्वीप उल्लंघन गरेकी थिइन् ।

पार्टीको ह्विप समेत उल्लंघन गरेपछि भने सो विषयमा छानबिन गर्न समाजवादीले पार्टी महासचिव रामसहायप्रसाद यादवको संयोजकत्वमा २ सदस्य सहितको कार्यदल बनाएको थियो । कार्यदलमा मोहम्मद इस्तियाक राई र सुशीला श्रेष्ठ सदस्य थिए ।

यादव नेतृत्वको कार्यदलले गिरीलाई कारबाहीको सिफारिसका लागि पार्टी केन्द्रीय कार्यालयलाई सिफारिस गरेपछि कारवाही भएको हो । उनीमाथि कारवाही भएसँगै उनको ठाउँमा सांसदका लागि सिटौलालाई ल्याउन लागिएको हो ।