बाढी प्रभावित परिवारलाई रेडक्रसको सहयोग
काठमडौं । मनसुनी वर्षाको कारण बाढी पहिरोले जनधनको क्षति भइरहेको र कोभिड १९ले समेत आक्रान्त पारिरहेको अवस्थामा रेडक्रस सञ्जालले देशभरि प्रतिकार्य तीव बनाएको छ ।
सिन्धुपाल्चोक, म्याग्दी, गुल्मी, जाजरकोट लगायत १८ वटा पहिरो अति प्रभावित जिल्लाहरूका दुईसय पच्चीस परिवारलाई नेपाल रेडक्रसले राहत सामग्रीको पूर्ण सेट उपलब्ध गराएको छ । वितरित सामग्री सेटमा तार्पोलिन –१, कम्बल–२, महिलाको सारी– १, सिलाउने कपडा–१४.५ मिटर, भाँडाकुँडा सेट–१, बाल्टी–१ र नाइनलको डोरी १० मिटर लगायतका सामग्री छन् । त्यसरी वितरित सामग्री सेटको प्रतिसेटको मूल्य रु. १० हजार रहेको छ ।
“अहिलेसम्म २५ लाख मूल्य बढीको सामग्री प्रत्यक्ष प्रभावित परिवारलाई उपलब्ध गराइएको छ र ५ हजार परिवारसम्मलाई सहयोग गर्ने तयारीमा छौँ । नेपाल रेडक्रसका विपद् व्यवस्थापनका निर्देशक मोना अर्यालले बताए।” उनले भने ‘ नेपाल सरकारसमेतको समन्वयमा बनाइएको मनसुन पूर्व तयारी योजना मुताबिक हामीले उद्धार, राहत सेवा पुर्याइरहेका छौँ ।’
यसका अतिरिक्त तत्कालको आवश्यकता अनुसार ५८२ वटा तार्पोलिन, ३९२ वटा कम्मल, १५ सेट भाँडाकुँडा र २ वटा टेन्ट प्रभावितलाई उपलब्ध गराइएको छ ।
बाढी पहिरोले आजसम्म कम्तीमा दुइहजार चार सय अठतीस परिवार विस्थापित भएको र ३ हजार ३ सय ५७ परिवारलाई गम्भीर असर परेको रेडक्रसको प्रारम्भिक अनुमान छ । त्यस्तै प्रारम्भिक प्रतिवेदन अनुसार चार सय पन्ध्र घर पूर्णक्षती भएका र पाँच सय पैँसट्ठी घरमा आंशिक क्षति पुगेको नेरेसोका सञ्चार विभाग निर्देशक दिव्यराज पौडेलले जानकारी दिए ।
बाढी प्रतिकार्यको लागि ३४ वटा टोली देशभरि परिचालित भएका छन् ।
यसैबिच हिजो सिन्धुपाल्चोकको मेलम्चीमा पहिरोले विस्थापित भएका २० परिवारलाई तत्कालै राहत सामग्री उपलब्ध गराइएको छ । त्यस्तै जाजरकोटको बारेकोटमा पनि पहिलो चरणको राहत सामग्री पुर्याइएको छ ।
निर्देशक पौडेलले भने,‘रेडक्रसका निकायहरूले स्थानीय स्रोत परिचालन र स्थानीय तहसँग गरेको समन्वयमार्फत पुर्याएको सेवा अतुलनीय छ । म्याग्दीको पश्चिमी भेगमा गएको पहिरोमा सडक अवरुद्ध हुँदा स्थानीय पहलमा हेलिकप्टरको प्रयोग गरी प्रभावित क्षेत्रमा सामग्री पुगेको छ ।’