सोती नरसंहार : ‘राज्यले टालटुल गर्न खोज्दैछ’ [भिडिओ सहित]

काठमाडौं । गत जेष्ठ १० गते आफ्नो साथीहरुसँग आफ्नो प्रेमिका लिन रुकुम–पश्चिमको चौरजहारी पुगेका नवराज विश्वकर्मा त्यहाँबाट घर फर्केनन् । नवराजसँगै गएका टीका नेपाली, गणेश बुढामगर, लोकन्द्र सुनार, सन्जु विश्वकर्मा र गोविन्द शाहीहरुले पनि पनि पुनः घर देख्नै पाएनन् । यो दुःखद घटनाको कारण थियो, अन्तरजातीय विवाह । जहाँ, एउटा दलित समुदायका नवराजले मल्ल थरकी केटीलाई लिन गएका थिए । तर उनीहरु सबै सपना भेरीमा सेलियो ।

त्यसपछि सडकदेखि सदनसम्म आवाज उठ्यो । नागरिक समाज जागे । सरोकारवालाहरु तातिए । अभियन्ताहरु जुर्मुराए । दलित समुदायले त काँचुली नै फेरेर सडक संघर्ष गर्यो । राजनीतिक दलहरुले पनि विभिन्न माध्यमबाट खबरदारी अनि दोषीमाथि कारबाही गर्न माग राखे । तर सरकारले न कसैको मागको सम्बोधन गर्यो । न आफैँले प्रभावकारी काम गर्न सक्यो । सरकारको यो कदम उसको नियतसँग जोडिएको राजनीतिक विश्लेषक तथा अभियन्ता आहुती बताउँछन् । उनी भन्छन्, “सरकारले यसलाई सामान्य भवितव्यको रुपमा लियो । यो राज्यको नियतसँग सम्बन्धित छ । यसलाई ढाकछोप गर्न खोजिएको छ, तर चेतनशील मान्छेहरुको दबाबले सरकारले यत्तिकै बेवास्ता गर्न पाउँदैन । सर्वसाधारणदेखि सञ्चारमाध्यमसम्मको कुरा नसुनेको राज्यकै पक्षमा वकालत कतिपय सांसद तथा नेताहरुले गरेको जानकारहरु बताउँछन् ।