मोरङ कारागारमा एक कैदीको मृत्यु

मोरङ । मोरङमा एक कैदीको कारागारमै मृत्यु भएको छ । कारागार कार्यालय मोरङमा बन्दी जीवन बिताइरहेको एक युवाको मृत्यु भएको हो ।

मोरङको सुन्दरहरैंचा नगरपालिका–४ घर भएका फुर्वासिंह तामाङको शनिबार (आज) बिहान मृत्यु भएको प्रमुख जिल्ला अधिकारी केशहरि निरौलाले मकालु खबरलाई जानकारी दिए ।

“आजै बिहान उहाँको मृत्यु भएको हो । उहाँ भर्खरैको मान्छे हो । मात्रै २६ वर्षको ।” अधिकारी निरौलाले भने, ‘उहाँ दीर्घ रोगी पनि हुनुहुन्नथ्यो । उहाँको पोष्टमार्टम हुँदै छ । केहीबेरपछि केही जानकारी आउला ।’

स्वास्थ्य समस्या भएपछि बिहान १ बजेतिर उनलाई कोसी अस्पतालमा लगिएको पनि उनले बताए । उनी चोरी मुद्धा पुर्पक्षका लागि जिल्ला अदालत मोरङको आदेशले ०७६ फागुन २२ देखि थुनामा थिए ।