आफू निकटको ओलीको भेलामा भट्ट पनि सहभागी, दाहाल–नेपाल पक्षको भेला आजै दिउँसो
मकालु खबर
काठमाडौं । प्रधानमन्त्री केपी शर्मा ओली पक्षीय प्रतिनिधि सभा सदस्यहरुको भेला अहिले जारी छ ।
आइतबार प्रतिनिधि सभा विघटन गरेपछि ओलीले आफू निकटका प्रतिनिधि सभा सदस्यहरुलाई बालुवाटार बोलाएर छलफल गरेका हुन् ।
भट्ट पनि पुगे बालुवाटार
यता पूर्वमाओवादीका नेता लेखराज भट्ट पनि बालुवाटार पुगेका छन् ।
यसअघि हिजोको परिघटनाका कारण कार्यकारी अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल पक्षका ७ जना मन्त्रीहरुले सामूहिक राजीनामा दिएका थिए । त्यसमा पूर्वमाओवादीका मन्त्री रामबहादुर थापा ‘बादल’ र भट्टले भने राजीनामा दिएनन् ।
ओलीलाई अनुशासनको कारबाही
यसअघि हिजो बसेको स्थायी कमिटी बैठकले ओलीलाई अनुशासनको कारबाही गर्ने निर्णय गरेको छ ।
जसको लागि पार्टीले १० गतेको लागि तय भएको केन्द्रीय कमिटी बैठक ७ गतेको लागि डाकेको छ ।
समितिका एक सदस्यले बताएअनुसार ओलीलाई साधारण सदस्यसमेत नरहनेगरी कारबाहीको तयारी गरिएको छ । ओलीइतर सांसदहरुले हिजै उनीविरुद्ध अविश्वासको प्रस्ताव दर्ता गराएका थिए ।
दाहाल–नेपाल पक्षीय भेला दिउँसो १ बजे
यस्तै यता दाहाल–नेपाल पक्षले पनि आफू निकटका प्रतिनिधि सभा सदस्यहरुलाई बोलाएको छ । भेला दिउँसो १ बजेका लागि बोलाइएको हो ।
बानेश्वरस्थित संसद भवनको ल्होत्से हलमा भेला हुन लागेको एक सांसदले जानकारी दिएका छन् ।
मकालु खबर
