दुर्घटनामा २ युवाको मृत्यु

काठमाडौँ । कैलालीमा ट्याक्टर र मोटरसाइकल ठोक्किँदा २ जनाको मृत्यु भएको छ । जिल्लाको घोडाघोडी नगरपालिका-१० पहलमानपुरमा गएराति दुर्घटना भएको हो ।

पूर्व-पश्चिम राजमार्गमा पश्चिमबाट पूर्वतर्फ गइरहेको म १ त ५४२ नम्बरको ट्याक्टर र सोही दिशातर्फ गइरहेको बा ९१ प ४०४ नम्बरको मोटरसाइकल ठोक्किँदा २ जनाको मृत्यु भएको हो । मृत्यु हुनेमा मोटरसाइकलमा सवार घोडाघोडी नगरपालिका-१० का २३ वर्षीय गोविन्द बुढा र १८ वर्षीय मानबहादुर बुढा रहेको प्रहरीले जनाएको छ ।

दुर्घटनापछि गम्भीर घाइते भएका उनीहरूको स्थानीय घोडाघोडी अस्पतालमा उपचारको क्रममा मृत्यु भएको हो । ट्याक्टर चालक घोडाघोडी नगरपालिका-५ का २१ वर्षीय रामसिंह चौधरी प्रहरीको नियन्त्रणमा छन् ।