धरानबाट नेकपाका ३ नेता-कार्यकर्ता पक्राउ

सुनसरी । आमहड्ताल सफल बनाउन धरानको भानुचोकमा खटिएका नेकपाको नेपाल-दाहाल समूहका तीनजना नेता, कार्यकर्ताहरु पक्राउ परेका छन् । पक्राउ पर्नेहरूमा खड्गबहादुर पौडेल, जीवन राई र विजय तामाङ रहेका छन् ।

उनीहरुले जबरजस्ती यातायात अवरुद्ध गराउन खोजेका कारण नियन्त्रणमा लिइएको इलाका प्रहरी कार्यालय धरानका डिएसपी ज्ञानेन्द्र बस्नेतले जानकारी दिए । पक्राउ परेका पौडेल यातायात मजदुर हुन् भने राई युवा संघ धरानको नगर सदस्य र तामाङ युवा संघको धरान नगर सह-संयोजक हुन् ।

पक्राउ परेका उनीहरुलाई ईलाका प्रहरी कार्यालयमा राखिएको छ । पक्राउ परेकाहरुलाई साँझसम्म राखिने र माथिल्लो निकायको निर्देशन बमोजिम छोड्ने वा राख्ने निर्णय गरिने डिएसपी बस्नेतले जानकारी दिए ।