नाट्टाको भवन निर्माणमा आइएमई ट्राभल्सको सहयोग

काठमाडौँ । आईएमई ट्राभल्सले आफ्नो २५औं वार्षिकोत्सवका अवसरमा नेपाल एसोसिएशन अफ टुर्स एण्ड ट्राभल्स (नाट्टा)को कार्यालय प्रयोजनार्थ निर्माणाधिन भवनको सहयोगका लागि  १ लाख ५१ हजार १ सय ११ रूपैयाँको चेक हस्तान्तरण गरेको छ ।

ट्राभल्सको केन्द्रीय कार्यालय काठमाडौंमा आयोजित एक विशेष कार्यक्रमका बीच आईएमई ग्रुपका अध्यक्ष एवम् नेपाल उद्योग वाणिज्य महासंघका बरिष्ठ उपाध्यक्ष चन्द्रप्रसाद ढकालले उक्त रकम बराबरको चेक नाट्टाका प्रथम उपाध्यक्ष विनय बस्नेतलाई हस्तान्तरण गरे ।

उक्त कार्यक्रममा आईएमई ट्राभल्सका संचालकद्वय सरिता ढकाल एवम् अर्जुन शर्मा पौडेल, प्रमुख कार्यकारी अधिकृत बिनोद सापकोटा र नाट्टाका महासचिव सुधिर उपाध्यायको उपस्थिति रहेको थियो ।

साथै, आईएमई ट्राभल्सले आफ्नो २५औं वार्षिकोत्सवका अवसर पारेर पर्यटन विकासमा सकारात्मक योगदान पु-याउने उद्देश्यले आन्तरिक पर्यटकहरूलाई लक्षित गर्दै बिभिन्न ग्राहकमुखी योजना ल्याएको छ । बैंकिङ्ग, रेमिट्यान्स, इन्स्योरेन्सलगायतका व्यावसायिक क्षेत्रमा आफुलाई अब्बल साबित गर्दै आइरहेको आइएमई समुहले पर्यटन क्षेत्रको समग्र बिकासमा महत्वपूर्णै योगदान दिँदै आएको छ ।

सोही अवसरमा आईएमई ग्रुपका अध्यक्ष एवम् नेपाल उद्योग वाणिज्य महासंघका बरिष्ठ उपाध्यक्ष चन्द्रप्रसाद ढकालले नेपालको समग्र बस्तुस्थिति नियाल्ने पहिलो आँखा पर्यटन उद्योग र यससँग सम्बन्धित क्षेत्र रहेकाले सम्पूर्ण व्यवसायी मित्रहरुलाई पर्यटन बिकासका लागि जुट्न आग्रह गरे । कोरोना महामारीका बीच स्वास्थ्य सम्बन्धि मापदण्ड पूर्ण रुपमा पालना गर्दै आफ्नो तह र तप्काबाट राज्यले निर्दिष्ट गरेका मापदण्डभित्र रहेर अझ बिशेष भूमिका खेल्न आग्रह गरे ।

आईएमई ट्राभल्सका प्रमुख कार्यकारी अधिकृत बिनोद सापकोटाले पर्यटन बिकासका लागि आईएमई ग्रुपले हालसम्म खेलेको भूमिकाको स्मरण गर्दै पर्यटन बिकासका लागि आफ्नो सेवालाई द्रुत गतिमा बिस्तार गर्ने जानकारी दिए ।