राज सागरको स्वरमा ‘ए मान्छे…’ सार्वजनिक (भिडियोसहित)

काठमाडौं । गजल र आधुनिक संगीतमा नाम कमाएका गायक राज सागरले विभेदविरुद्धको सांगीतिक कोशेली ‘ए मान्छे…’ सार्वजनिक गरेका छन् । ५६ औँ अन्तर्राष्ट्रिय रङ्गभेद तथा सबै खाले जातीय विभेद उन्मूलन दिवस २१ मार्चको सन्दर्भ पारेर गायक राज सागरले सन्देशमूलक सांगीतिक भिडियो सार्वजनिक गरेका हुन् ।

चर्चित लेखक आहूतिको शब्द रहेको ‘ए मान्छे…’ २१ औं शताब्दीमा मान्छेले व्यहोर्नुपरिरहेको विभेदविरुद्धको रचनात्मक आवाज रहेको गायक राज सागरको ठम्याइ छ । मर्यादा मिडियाको प्रस्तुति रहेको सांगीतिक भिडियो राजसागरकै संगीतमा तयार गरिएको हो । अझै पनि जातले नेपाली समाजमा मानिसको सामाजिक हैसियत नाप्ने तुलोको काम गर्दै आइरहेको सन्दर्भमा असमानता र अन्यायको जरो जातलाई हल्लाउने र उखेलेर फाल्ने प्रयासस्वरुप गीति कोशेली ल्याएको गायक राज सागर बताउँछन् ।

‘माया पिरतीका धेरै गीत गाइयो, ताली पनि पाइयो । नाम र दाम सबै पाइयो तर समाजलाई के दिन सकियो भन्ने आफैँभित्रको प्रश्नको उत्तर हो यो मेरो ‘ए मान्छे…‚’ गायक राज सागर रोमान्चित हुँदै थप्छन्, ‘मान्छेहरु जातकै कारण मारिने क्रम नरोकिँदा आफूले सांगीतिक क्षेत्रबाट सानो प्रयास किन नगर्ने भन्ने हुटहुटीले आज पूर्णता पाएको छ ।’

संजीव बराइलीको संगीत संयोजनमा प्रस्तुत गीत भ्वाइस अफ नेपालमा रेकर्ड गरिएको हो । भिडियोको निर्देशन श्याम नेपालले गरेका हुन् भने सम्पादन युसब सापकोटाले गरेका हुन् ।
https://www.youtube.com/watch?v=1rq9zVx7AXE