लुम्बिनी प्रदेश : मुख्यमन्त्रीविरुद्ध अविश्वास प्रस्ताव दर्ता
मकालु खबर
बुटवल । लुम्बिनी प्रदेशका मुख्यमन्त्री शंकर पोखरेलविरुद्ध अविस्वासको प्रस्ताव दर्ता भएको छ । लुम्बिनी प्रदेशका कांग्रेस सचेतक फकरुद्धिन खानले मकालु खबरलाई दिएको जानकारीअनुसार मुख्यमन्त्री पोखरेलविरुद्ध दर्ता भएको प्रस्तावमा ४१ जना प्रदेशसभा सदस्यहरुले हस्ताक्षर गरेका छन् । ‘मुख्यमन्त्रीविरुद्ध अविश्वासको प्रस्ताव दर्ता भएको छ,’ खानले भने, ‘त्यहाँ ४१ जना सांसदहरुले हस्ताक्षर गर्नुभएको छ ।’
नेकपा माओवादी केन्द्र, नेपाली कांग्रेस र जनता समाजबादी पार्टीका सबै सांसदले हस्ताक्षर गरेको अविश्वासको प्रस्तावमा माओवादीका कुलप्रसाद केसीलाई मुख्यमन्त्रीका रुपमा प्रस्ताव गरिएको छ ।
प्रस्तावमा प्रदेशमा एक सिट भएको राष्ट्रिय जनमोर्चाका सांसदको पनि समर्थन रहेको तीन दलले दाबी गरेपनि उनको हस्ताक्षर भने छैन । केसी अहिले प्रदेशमा आन्तरिक मामिलामन्त्री छन् । माओवादी केन्द्रले सरकारलाई दिएको समर्थन फिर्ता लिएको पनि जनाएको छ ।
लुम्बिनी प्रदेशसभाको अधिवेशन अहिले अन्त्य भएकाले बैठक बोलाउन प्रदेश प्रमुख धर्मनाथ यादवलाई समावेदन गर्ने तयारी पनि रहेको पनि सांसदहरुले बताएका छन् ।
मकालु खबर
