संवैधानिक इजलास गठन : छानिए यी ४ न्यायाधीश
मकालु खबर
काठमाडौं । संसद् विघटनविरुद्धको रिटमाथि सुनुवाइ गर्न प्रधानन्यायाधीश चोलेन्द्रशम्शेर जबराले संवैधानिक इजलास गठन गरेका छन् । इजलासमा न्यायाधीशहरु दीपककुमार कार्की, डा. आनन्दमोहन भट्टराई, तेजबहादुर केसी र बमकुमार श्रेष्ठलाई इजलासमा राखिएको छ ।
संवैधानिक इजलासमा प्रधानन्यायाधीशसहित ५ जना न्यायाधीश हुन्छन् । प्रधान न्यायाधीशले आफूसहित रोष्टरमा रहेका सिनियर न्यायाधीशमध्येबाट इजलास गठन गर्ने कानुनी व्यवस्था छ ।
प्रतिनिधि सभा विघटनविरुद्ध परेको रिटमा शुक्रवारबाट संवैधानिक इजलासमा सुनुवाइ हुँदैछ । बिहीबार (हिजो) प्रधानन्यायाधीशको एकल बेन्चले १९ वटा रिटलाई संवैधानिक इजलासमा पठाउने आदेश गरेको थियो ।
विपक्षी गठबन्धनका नेता शेरबहादुर देउवासहित १४६ जना सांसदले संसद् पुनः स्थापना गरेर देउवालाई प्रधानमन्त्री घोषण गर्न माग गर्दै संवैधानिक इजलासमा सुनुवाइ हुनुपर्ने माग गरेर रिट दर्ता गराएका छन् ।
संवैधानिक इजलासमा सुनुवाइको माग गर्दै ११ वटा रिट दर्ता भएका छन् । विघटनविरुद्ध परेका कूल ३० वटा रिटउपर आजबाट संवैधानिक इजलासमा सुनुवाइ हुनेछ ।
यसअघि पनि प्रधानमन्त्री केपी शर्मा ओलीले संसद् विघटन गरेका थिए । जसमा सर्वोच्चले संवैधानिक इजलासबाटै सुनुवाइ गर्दै पुनःस्थापनाको फैसला सुनाएको थियो ।
मकालु खबर
