काठमाडौं । नेपालमा वैकल्पिक राजनीतिका अगुवा तथा विवेकशील नेपाली दलका संस्थापक तथा विवेकशील साझा पार्टीका पूर्व संयोजक उज्वल थापाको निधन भएको छ ।
कोभिड संक्रमण भएपछि ललितपुरको मेडिसिटी अस्पतालमा उपचार गराइरहेका थापाको मंगलबार ४:२५ बजे निधन भएको अस्पताले पुष्टि गरेको हो । गम्भीर बिरामी रहेका उनको उपचारमा इसीएमओ प्रविधी प्रयोग गरिएको थियो । तापनि उनलाई बचाउन नसकिएको उपचारमा संलग्न चिकित्सकले बताएका छन् ।
कोभिड संक्रमण देखिएपछि उनी ग्राण्डी अस्पतालमा भर्ना भएका थिए । तर भेन्टिलेटरमा राखेर उपचार गर्दा पनि खास सुधार नभएपछि ईसीएमओका लागि मेडिसिटी लगिएको थियो ।
नेपालमा वैकल्पिक राजनीतिको अगुवाई गरेका थापा गएको चुनाबमा काठमाडौं क्षेत्र नम्बर ५ बाट उम्मेदवार पनि बनेका थिए ।
उनको उपचारका लागि देशविदेशमा रहेका उनका शुभचिन्तकले रकम संकलन गरेका थिए । २४ घण्टामा करिब ५० लाख रुपैया जम्मा भएपछि रकम संकलन कार्य बन्द गरिएको थियो ।
थापाका परिवार, साथी र शुभेच्छुकहरूको तर्फबाट जारी गरिएकाे विज्ञप्ति
उज्वल थापा हामीबिच रहनुभएन !
हाम्रा छोरा, श्रीमान्, दाइ, भान्जा, मित्र, काका, ठूलो बुबा, नाति, मामा, हजूरबुबा, ज्वाइँ, भिनाजु, विवेकशील अभियान तथा विवेकशील नेपाली दलका संस्थापक, विवेकशील साझा पार्टीका पूर्व संयोजक, उद्यमी, सामाजिक उत्प्रेरक, हाम्रा प्रिय उज्वल बहादुर थापा, ४४, हामी सबैको अथक प्रयास, सहयोग र प्रार्थनाका बाबजुद (२०७८ साल जेठ १८ गते, अपराह्न ४:२५ बजे) हामीबिच रहनु भएन ।
हामी उहाँप्रति हार्दिक श्रद्धाञ्जलि व्यक्त गर्दछौँ !
उहाँले प्रभाव पारेका जिन्दगीहरू र उनीहरूका सफलताहरू; नेपालको राजनीतिक प्रणालीको सुधार गर्न उहाँले गर्नुभएका हस्तक्षेपहरु; युवाहरूलाई राजनीतिको मूलधारमा समावेश गर्न उहाँको उत्प्रेरणा तथा सहयोग लामो समयसम्म सम्झिइनेछ र त्यसलाई इतिहासले सकारात्मक किसिमले मूल्याङ्कन गर्नेछ भन्ने हामीलाई लागेको छ ! उज्वल थापा व्यक्ति मात्र नभई, एउटा दर्शन र विचार पनि हो र सोहीमा उहाँ जीवन्त रहनु हुनेछ भन्ने हाम्रो अनुभूति हो । उहाँले देखेका सपना पूरा गरी हरेक नेपालीको मुहारमा खुसी ल्याउन हामी सबै दृढ संकल्पित छौँ !
उहाँको उपचारमा संलग्न सम्पूर्ण स्वास्थ्यकर्मीहरूप्रति हामी आभारी छौँ । यस्तो विषम परिस्थितिमा धैर्य धारण गरी संयमताका साथ उज्वलको लागि साथ, सहयोग दिनुहुने र अनवरत प्रार्थना गरिरहनु भएका उज्वलका आफन्तजन, नेपाल भित्र र बाहिरका साथी तथा शुभेच्छुक सबैप्रति हामी कृतज्ञ छौँ । तपाईंहरूले व्यक्त गर्नुभएका सद्भाव, सदिच्छा तथा प्रार्थनाको लागि हामी आभारी छौँ । नेपालका राष्ट्रपतिज्यू, नेपाल सरकार तथा विभिन्न राजनीतिक दलका तर्फबाट व्यक्त भएको सहयोग गर्ने इच्छा, सद्भाव र शुभेच्छाको लागि हामी कृतज्ञ छौँ ।
अन्तिम पटक गरिएको कोरोना भाइरस परीक्षणमा नतिजा नेगेटिभ रहेको भए पनि अहिलेको संक्रामक रोगको समयमा उहाँको अन्तिम संस्कार एउटा साधारण पारिवारिक तवरले सम्पन्न गर्ने परिवारको इच्छा भएकोले सम्भव भएसम्म सहभागी नभइदिनुहुन हामी आग्रह गर्दछौँ ।
उज्वल बहादुर थापाको परिवार, साथी र शुभेच्छुकहरूको तर्फबाट,
मकालु खबर
