गीत : कालीगण्डकी
ए कालीगण्डकी …!
हे आमा गण्डकी …!
माकुरोको माउ भयो
तिम्रो जिन्दगी
तिम्रो अमृतधारा पिई
हुर्किएका सन्तान
तिम्रै मुटु कलेजा पो
कुटुकुटु खान्छन्
ए कालीगण्डकी …
तिम्रो नाम कैलाशदेखि
काशी गङ्गासम्म
तर तिम्रै काख रित्तो
लुटे शालिग्राम
ए कालीगण्डकी …
तिम्रो निश्चल बगाइमा
हिमाल ऐना हेर्थ्यो
कौडा नाच्थे डाँफे मुनाल
घामले भाका फेर्थ्यो
ए कालीगण्डकी …
यता गैह्रो उता पैह्रो
त्चँ ! त्चँ ! कठैबरा
कुन विरह बोकी बसाइँ
सर्यो पानीचरा
ए कालीगण्डकी …
पुर्खा थिए माहुरीझैँ
तिमी तिनको रानी
तर तिम्रा सन्तान चैँ
तिम्रै मलाम् जानी
ए कालीगण्डकी …
लाज‚ घिन‚ पाप‚ धर्म
छैन कुनै डर
आफ्नै आमा बेची मान्छे
बनाउँदैछन् घर
ए कालीगण्डकी …
हे आमा गण्डकी …!
माकुरोको माउ भयो
तिम्रो जिन्दगी
०००
गीतकार तथा कवि मुकारुङले यो गीत कालीगण्डकी बचाऔँ अभियानप्रति ऐक्यबद्धता जनाउँदै अहिले भइरहेको कालीगण्डकी दाेहनमाथि लेखेका हुन्‚ जसलाई उनले ‘लिरिकल पोइम : कालिगण्डकी ब्लूज’ भनेका छन् ।
