एमालेले संसदीय दलको बैठकमा, अविश्वास प्रस्तावबारे छलफल हुने

काठमाडौँ । नेकपा एमाले लुम्बिनी प्रदेशले संसदीय दलको बैठक बोलाएको छ । विपक्षी गठबन्धनले मुख्यमन्त्री शंकर पोखरेलविरुद्ध अविश्वासको प्रस्ताव दर्ता गराएपछि भावी रणनीति तय गर्न बैठक बोलाइएको हो ।

याे पनि : मुख्यमन्त्रीविरुद्ध दायर अविश्वास प्रस्ताव सदनमा टेबल हुँदै

बैठक मुख्यमन्त्री पोखरेल निवास मिलनचोकमा अहिले बिहान ८ बजे बस्ने गरी बोलाइएको छ । बैठकले अविश्वासको प्रस्तावको सामना गर्ने या राजीनामा दिने भन्ने टुंगो लगाउने बताइएको छ ।

थप : लुम्बिनी प्रदेशका भौतिक पूर्वाधार मन्त्री मन्त्रीले दिए राजीनामा

मुख्यमन्त्री पोखरेलविरुद्ध विपक्षी नेपाली कांग्रेस, नेकपा (माओवादी केन्द्र), जनता समाजवादी पार्टी, नेपाल र राष्ट्रिय जनमोर्चाले साउन १९ गते तेस्रो पटक अविशवास प्रस्ताव दर्ता गराएका थिए ।

अविश्वास प्रस्तावमाथि छलफल गर्न प्रदेशसभाको विशेष अधिवेशन बुधबार दिउँसो १ बजे बस्दैछ । ८७ सदस्य रहेको लुम्बिनी प्रदेशमा कारबाही र राजीनामा प्रकरणपछि ८० सदस्यमात्र छन् । बहुमतका लागि ४१ सदस्य आवश्यक पर्छ ।

विपक्षी गठबन्धनमा कांग्रेसका १९, माओवादीका सभामुखसहित १९, जनता समाजवादीका ३ र जनमोर्चाका १ गरी ४२ सदस्य छन् । सत्ता पक्षमा एमालेका ३८ जना मात्र छन् ।