बा ! ऊ त मन्त्री भयो
बा
माथि पहाडका राताम्य गुराँसहरुमा
बेसीका पहेँल पुर फाँटहरुमा
बस्, म तिमिलाई नै खोजिरहेछु ।
खले गह्रामा दाँदे लगाउँदै गरेका
ठुले गोरे र भुन्टेहरुमा
ब्याडमा बिउ काढिरहेका
मनसरी, जयकली र झुपीहरुमा
बा
म तिम्रै न्यास्रो मेटिरहेछु ।
अगेनाको डिलमा भिजेको भोटो सेकाउनेहरुमा
नाकसरे उकालोमा आफूभन्दा ठुलो भारी बाेकेर
तरतरी पसीना बगाउँदै सन्तानका सपना फुलाउनेहरुमा
बा म तिमिलाई नै देखिरहेको छु ।
बा
जीवन खोज्दै लाहुर छिरेको
पल्लाघरे थोप्ले कफनमा निदाएर फर्किएको छ
ठेकेदारको डोजरको कम्पन थेग्न नसकेर
गर्ल्यामगुर्लुम गोफ्लेको घर भत्किएको छ ।
के सुनाऊँ र यहाँका खबर वा
यो बर्खा पल्लो गाउँ पहिरोले स्वात्तै वगायो
पुछारको फाँट खोलाले बगर बनायो ।
अँ साँच्ची वा खुसीको कुरो पनि छ
तिम्रा काँध चढेर हिँड्ने माथ्लाघरे साइँलो
अहिले मन्त्री भएको छ
तिम्ले ताते गराउँदै हिँड्न सिकाएको प्युसे
राजदूत भएको छ,
तर उस्तै छ वा हाल तिम्रो गाउँको
हिजोमात्रै फोर्साबाेटे ठुल्कान्छो
हनहनती ज्वरो आएको बेला एक गोली
सिटामोल नपाएर मर्याे
नेप्टीको पनि त्यही हाल भो वा
सुत्केरी बेथाले च्याप्दा एम्बुलेन्सको पखाईमै
उसले अन्तिम श्वास फेरि ।
यहाँको खबर त उही हो बा
उसैगरी लाहुर जानेको ताँती चलेकै छ
बसाइँ सर्नेहरुको बहाना चलेकै छ ।
त्यसैले त बा
गाउँ छोडेर बसाइ सर्नेहरुमा
सुकिला मुकिला भएर निर्धा र निमुखामाथि शासन गर्नेहरुमा
मैले तिम्लाई देख्न छोडेँ
आजकल त बा
मैले गोरे, भुन्टे र ठुलेहरुमा
अनि मनसरी, जयकली र झुपीहरुमा
तिमीलाई खोजिरहेको छु ।
- सबै बाहरुमा समर्पित
