कपनबाट हराएका बालक विहारमा भेटिए

काठमाडौं ।

कपनबाट हराएका एक बालक भारतमा भेटिएका छन् । सोमबार अपराह्न घर नजिकैबाट सम्पर्कविहीन भएका चार वर्षीय पियुष शर्मा भारतमा भेटिएका हुन् । काठमाडौं प्रहरी परिसर, टेकुले भारतीय प्रहरीसँगको समन्वयमा खोजी गर्दा विहारमा बालक फेला परेका हुन् ।

बालकको घर नजिकै बस्ने शंकर दासले सोमबार अपराह्न ४ बजे उनलाई लिएर हिँडेको देखिएको थियो । परिवारले दिनभर खोज्दा पनि नभेटिएपछि उनका बुबाले प्रहरीलाई जानकारी गराएका थिए ।

हाल दासलाई नियन्त्रणमा लिएर थप अनुसन्धान भइरहेको प्रहरीले जनाएको छ । यद्यपि बालकलाई भारत किन लगिएको हो भन्ने कारण भने खुल्न सकेको छैन ।