भारतीय कांग्रेसकी महासचिव प्रियंका गान्धी पक्राउ

काठमाडौँ । भारतीय कांग्रेसकी महासचिव प्रियंका गान्धी पक्राउ परेकी छन् । सोमबार बिहान साढे पाँच बजे उनी उत्तर प्रदेशको सितापुरस्थित हरगाउँबाट पक्राउ परेकी हुन् । उत्तर प्रदेशको लखिमपुर खिरीमा भइरहेको किसान आन्दोलनमा सहभागी हुन जाने क्रममा उनलाई प्रहरीले नियन्त्रणमा लिएको हो ।

उनलाई त्यहाँ जान नदिन प्रहरीले विभिन्न ठाउँमा गाडी रोक्दै चेकिङ गर्दै आएको थियो । सोही क्रममा उनी  सितापुरको हरगाउँबाट पक्राउ परेकी हुन् ।

यद्यपि गान्धीलाई प्रहरीले लखनउमै रोक्न प्रयास गरेको थियो । सो क्रममा कांग्रेस कार्यकर्ता र  प्रहरीबीच तनावको वातावरण सिर्जना भएको थियो । भारत सरकारले ल्याएको कृषि कानुनविरुद्ध किसानहरू लामो समयदेखि आन्दोलनमा छन् ।

सोही आन्दोलनको क्रममा उत्तर प्रदेशको लखिमपुर खिरमा राज्यमन्त्रीका छोराले किसानमाथि गाडी चलाएका छन् । उक्त घटनामा ८ जना मारिएको भारतीय सञ्चारमाध्यमले जनाएका छन् ।

यो पनि…

भारतमा राज्यमन्त्रीका छोराले किसानमाथि गाडी चलाउँदा ८ जनाको मृत्यु