अल्मुताइरी आज नेपाल आउँदै 

काठमाडौँ । नेपाली राष्ट्रिय फुटबल टिमका मूख्य प्रशिक्षक अब्दुल्लाह अल्मुताइरी आज नेपाल आउने भएका छन् । माल्दिभ्समा भएको साफ च्याम्पियनसिप पछि उतैबाट कतार हुँदै कुवेत गएका अल्मुताइरी आज नेपाल फर्किने भएका हुन् । उनले अल्मुताइरीले कतारको हमाद विमानस्थलमा नेपाल फर्कने विमान कुरिरहेको फोटो सामाजिक सञ्जालमा राख्दै नेपाल फर्कन लागेको जानकारी दिएका हुन् ।

च्याम्पियनसिपकै बेला अब नेपाल नफर्किने घोषणा गरेका उनी अखिल नेपाल फुटबल संघ (एन्फा)का अध्यक्ष कर्माछिरिङ शेर्पा र कतार फुटबल संघसँग छलफल गरेपछि नेपाली फुटबल टिमको मूख्य प्रशिक्षकका रूपमा फेरि नेपाल आउन राजी भएका हुन् ।

कतार फुटबल संघले नै तलब भत्ता दिने गरी नेपाल पठाएको थियो । साफ च्याम्पियनसिपमा नेपाललाई फाइनल पुर्‍याएसँगै उनी सफल प्रशिक्षकका रूपमा चिनिएका छन् । बोलीका कारण बेलाबेला विवादमा परे पनि अल्मुताइरीले नेपाली फुटबल टिममा नयाँ जोस भरेको फुटबल क्षेत्रका जानकारहरू बताउँछन् ।