अपडेट : मतदान गर्न अब २५० जना बाँकी

काठमाडौँ । नेपाली कांग्रेसको १४ औँ महाधिवेशन अन्तर्गत अहिले भइरहेको मतदान अन्तिम चरणमा पुगेको छ । निर्वाचन समिति श्रोतका अनुसार अब २५० मत खस्न बाँकी छ । जम्मा ४७४३ मध्ये २५० जनाले मतदान गर्न बाँकी रहेको श्रोतले जनाएको छ ।

मतदानका लागि राती साढे ११ बजेसम्मको समय तोकिएको छ ।

मतदान सकिएपछि प्राविधिक कुराहरु सकेर राती १ बजेबाट मतगणना शुरु गर्ने तयारी रहेको पनि समितिले जनाएको छ । मतदानस्थल राष्ट्रिय सभा गृह मा सभापतिको मतगणना गरिने छ ।

सभापतिमा निर्वाचित हुन ५० प्रतिशत मत कटाउनैपर्ने विधान रहेका कारण सभापतिको गणना गर्ने तयारी गरिएको समितिले जनाएको छ । कुनैपनि उम्मेदवारले ५० प्रतिशत मत नकटाएमा सभापति छान्न दोस्रो चरणको निर्वाचन हुनेछ । जसमा सबैभन्दा बढी मत ल्याउने २ जनाबीच दोस्रो चरणमा निर्वाचन हुनेछ । पहिलो चरणमा कसैले ५० प्रतिशत नकटाए मंगलबार पुनः दोस्रो चरणको मतदान गर्ने तयारी छ ।

सभापतिको नतिजा टुंग्याएपछि मात्रै पदाधिकारी र केन्द्रीय सदस्यहरुको मतगणना सुरु हुने र मतगणना कांग्रेस केन्द्रीय कार्यालय सानेपामा गरिने समितिले जनाएको छ । सबै पदको अन्तिम परिणाम आउन कम्तीमा १ साता लाग्ने पनि निर्वाचन समितिले जनाएको छ ।