भिरबाट खसेको ढुङ्गा लागेर एक जनाको मृत्यु

सुर्खेत । भिरबाट खसेको ढुङ्गा लागेर डोल्पाका एक पुरुषको मृत्यु भएको छ । उक्त ढुङ्गा लाग्दा घाइते भई उपचारमा रहेका डोल्पाका पुरुषको आइतबार बिहान मृत्यु भएको हो ।

कर्णाली प्रदेश प्रहरी कार्यालयले डोल्पाको मुडकेचुला गाउँपालिका–१ वाईगाँउका ३२ वर्षीय जगबहादुर बोहराको उपचारको क्रममा नेपालगञ्ज नर्सिङ होममा मृत्यु भएको जनाएको छ ।

प्रहरीका अनुसार जगबहादुर र उनकी श्रीमती (हिमाली बोहरा) शनिबार घोडा/खच्चर लिएर सामान लिन जाजरकोट गएका थिए । उनीहरू रुकुमपश्‍चिम जिल्लाको आठबिसकोट नगरपालिका–६ मा पर्ने ज्यामिरे भिरमा पुग्दा माथिबाट खसेको ढुङ्गा बोहराको टाउकोमा लागि गम्भीर घाइते भएका थिए ।

उक्त घटना शनिबार दिउँसोको साढे दुई बजेतिर घटेको प्रहरीले जनाएको छ । घाइते बोहरालाई स्थानीयले तत्काल उद्धार गरी उपचारको लागि नेपालगञ्ज लगिएको थियो ।