अमेरिकामा कोराेनाका कारण मृत्यु हुने बढ्दै
अमेरिका । संयुक्त राज्य अमेरिकामा कोभिडका कारण हुने मृत्यु बढ्दो रूपमा रहेको देखिएको छ । यसलाई अमेरिकाका अधिकारीहरूले चिन्ताजनक पनि भनेका छन् । प्राप्त पछिल्लो समाचारअनुसार यहाँ गएको सात दिनसम्म कोभिडका कारण हुने मृत्यु बढ्दै गएको छ । बुधवार मात्र यहाँ २४ घन्टामा कोभिडबाट २ हजार भन्दा बढीको ज्यान गएको छ ।
बुधवारको पछिल्लो तथ्यांकअनुसार अमेरिकामा एकैदिनमा कोभिडबाट २ हजार २५९ जनाको ज्यान गएको थियो । तर उता कोभिडबाट हुने संक्रमितको संख्या भने अहिले घटेको छ । पछिल्लो केही दिनयता यो संक्रमण दरमा करिब १३ प्रतिशतले कमी आएको देखिएको छ ।
यहाँ दैनिक ६ लाखभन्दा बढी नै संक्रमित पाइने गरेका छन् । अमेरिका कोभिडबाट सबैभन्दा बढी प्रभावित देशमा पर्दछ । अमेरिकामा विश्वमा नै कोभिडबाट सबैभन्दा बढी नागरिकको ज्यान गएको छ भने संक्रमण दर पनि धेरै रहेको पाइएको छ ।
यहाँ अहिलेसम्म कोभिडबाट ९ लाख ६ हजार भन्दा बढीको ज्यान गएको छ । विश्वका अन्य देशको तुलनामा यो सबैभन्दा बढी हो ।
