केएमसीमा बन्यो नेपालकै ठूलो र सस्तो आइसीयू सेन्टर

काठमाडौँ । काठमाडौँ मेडिकल कलेज (केएमसी) नेपालको सबैभन्दा ठूलो सघन उपचार कक्ष (आइसीयू) भएको अस्पताल बनेको छ । केएमसीले मंगलबार एक कार्यक्रमको आयोजना गरी १६८ बेड क्षमताको आइसीयू कक्षको औपचारिक उद्घाटन गरेको हो ।

केएमसीका प्रमुख सल्लाहकार डा. केपी शर्मा र अस्पताल निर्देशक डा. सुमन श्रेष्ठले आइसीयू सेन्टरको उद्घाटन गरेका छन् । गत वर्षदेखि केएमसीको व्यवस्थापन फेरिएको छ ।

पूर्वी नेपालमा प्रतिष्ठित नोबेल मेडिकल कलेजका सञ्चालक डा. सुनिल शर्माले केएमसी अध्यक्षको जिम्मेवारी सम्हालेदेखि केएमसीले सेवा सुविधा बढाउँदै लगेको छ । पहिले केएमसीमा आइसीयूका ३४ बेड थिए ।

हाल १३४ बेड थरेर नेपालकै सबैभन्दा ठूलो १६८ बेड क्षमताको आइसीयू सेन्टर सञ्चालनमा ल्याइएको केएमसीका अध्यक्ष डा. शर्माले शताए । उनले भने, ‘अब केएमसी नेपालको सबैभन्दा ठूलो आइसीयू सेन्टर भएको छ, अहिले हामीले १६८ बेड क्षमताको आइसीयू सञ्चालमा ल्याएका छौँ, नेपालका कुनै पनि निजी वा सरकारी अस्पतालमा यत्रो आइसीयू सेन्टर छैन ।’

केएमसीले यसअघि नेपालकै सबैभन्दा ठूलो र अत्याधुनिक सुविधासहितको नवजात शिशु सघन उपचार कक्ष र बाल रोग सघन उपचार कक्ष पनि सञ्चालनमा ल्याइसकेको छ । अहिले ६८ बेडको जेनेरल आइसीयू, ४० बेडको एनआइसीयू, २२ बेडको पल्मो आइसीयू, १२ बेडको एमआइसीयू, ११ बेडको एसआइसीयू, १० बेडको पीआइसीयू र ५ बेडको न्यूरो आइसीयू सञ्चालनमा ल्याइएको छ ।

आइसीयू शुल्क पनि नेपालकै सबैभन्दा सस्तो कायम गरिएको केएमसीका महाप्रबन्धक नारायण दाहालले जनाए । उनले भने, ‘सरकारी क्षेत्रबाट सञ्चालित वीर अस्पताल र सिभिल अस्पतालमा आईसीयू चार्ज दुई हजार छ, हामीले १९ सय रुपैयाँमै आइसीयू उपलब्ध गराउने गरेका छौ ।’
केएमसीले नेपालका अन्य सरकारी अस्पताल र निजी अस्पतालहरू भन्दा पनि सस्तो आइसीयू शुल्क कायम गरेको उनको जिकिर छ । केएमसीले ५८ वटा भेन्टिलेटर पनि सञ्चालनमा ल्याएको छ ।