रोकिराखेको ट्रकमा कार ठोक्किँदा तीन जनाको मृत्यु

काठमाडौँ । रुपन्देहीमा सडकमा रोकिराखेको ट्रकमा कार ठोक्किँदा कारमा सवार तीन जनाको मृत्यु भएको छ । बुटवल उपमहानगरपालिका वडा नम्बर -१२ तामनगरमा आज बिहान भएको दुर्घटनामा तीन जनाको मृत्यु भएको हो ।

लुम्बिनी प्रदेश ट्राफिक प्रहरी कार्यालय बुटवलका प्रवक्ता मोहन खाणकाअनुसार रोकिराखेको लु २ ख ९७७२ नम्बरको ट्रकमा लु ३ च ४४४२ नम्बरको कार ठोक्किँदा एक जनाको घटनास्थलमै र दुई जनाको उपचारको क्रममा अस्पतालमा मृत्यु भएको छ । मृत्यु हुनेमा बुटवल १३ का २८ वर्षीय सविन चौधरी, २६ वर्षीय गोबिन्द चौधरी र कारका चालक २७ वर्षीय नवीन श्रेष्ठ छन् ।

दुर्घटनामा बुटवल-१३ का भगीरथ चौधरी र वडा नम्बर १२ का अनिष जिसी गम्भीर घाइते भएका छन् । उनीहरूको लुम्बिनी प्रादेशिक अस्पतालमा उपचार भइरहेको प्रवक्ता खाणले बताए । कारमा पाँच जना सवार रहेको प्रहरीले जनाएको छ ।