सीमा सुरक्षा ऐन बनाउँदै गृह, गाँजाकाे औषधीय प्रयाेगकाे बाटाे खाेलिँदै

काठमाडौँ । गृह मन्त्रालयले ‘गृह प्रशासन सुधार कार्ययोजना–२०७८’ जारी गरेको छ ।

मन्त्रालयले अपराध अनुसन्धान तथा नियन्त्रण, सीमा सुरक्षा, आन्तरिक प्रशासनिक सुधारलगायतका विषय समेटेर कार्ययाेजना अघि सारेकाे हाे ।

गृहमन्त्री बालकृष्ण खाँणले सोमबार मन्त्रालयमा आयोजित कार्यक्रममा २ सय ६ बुँदामा समेटिएको कार्ययोजना सार्वजनिक गरेका हुन् ।

कार्ययोजनामा सीमा सुरक्षादेखि गृह मन्त्रालय, त्यस मातहतका अरू निकाय, प्रहरी र सशस्त्र प्रहरीको कामकारबाहीलाई व्यवस्थित, आधुनिकीकरण र साधनस्रोतयुक्त बनाइने विषयहरू समेटिएका छन् ।

कार्ययोजनामा १ वर्षभित्र सीमा सुरक्षा ऐन बनाइने उल्लेख छ । यसअघि बारम्बार सीमा सुरक्षा नीति ल्याउनुपर्ने विषयमा बहस भए पनि निर्णय हुन सकेको थिएन ।

यस्तै कार्ययाेजनामा गाँजाको औषधीय प्रयोगका लागि ६ महिनाभित्र कार्यविधि तर्जुमा गरी कार्यान्वयनमा ल्याइने उल्लेख छ ।