सदनलाई सुचारु गर्न विभिन्न दलका नेतासँग छलफल हुँदैछ : गृहमन्त्री

काठमाडाैँ । गृहमन्त्री बालकृष्ण खाँणले सदनलाई सहज रूपमा अघि बढाउनका लागि विभिन्न दलका नेताहरूसँग छलफल भइरहेको बताएका छन् ।

बिहीबार संसद् भवन परिसरमा सञ्चारकर्मीसँग कुरा गर्दै खाँणले सरकार सदन सुचारु गराउन चाहने भन्दै यसका लागि छलफल भइरहेको बताएका हुन् । उनले सदनलाई सहज गराउने र प्रक्रियामा अगाडि बढेका प्रस्तावहरूलाई टुंगोमा पुर्याउने गरी कोसिस भइरहेको जानकारी दिए । उनले सरकारमा रहेका सबै घटकहरूले सरकारले ल्याएको प्रस्तावको पक्षमा मतदान गर्नुपर्ने धारणा पनि राखे ।

त्यस्तै, एमाले नेता योगेश भट्टराईले एमालेले उठाएका माग सम्बोधन नगरी सरकारलाई सहयोग गर्न नसकिने प्रष्ट पारे । उनले गठबन्धनकै कारण नेपालको अन्तर्राष्ट्रिय छवि बिग्रिएको पनि बताए । एमसीसी पारित गराउने दायित्व प्रतिपक्षी दलको नरहेको भन्दै भट्टराईले सरकारको मुख्य घटक नेपाली कांग्रेसले प्रतिपक्षसँग संवाद गर्न सकारात्मक पहल भएको जिकिर गरे ।

त्यस्तै नेकपा एकीकृत समाजवादी नेता जीवनराम श्रेष्ठले एमसीसीलाइ जवरजस्त अघि बढाउन नहुने र यसका लागि सदनलाई सूचारु गर्नुपर्ने धारणा राखे ।

त्यस्तै, प्रतिपक्षको अवरोध हटाउन प्रधानमन्त्री र सभामुखले पहल गरौँ भनेर कार्यव्यवस्थामा आफूहरूले नै सुझाव दिएको उनले बताए ।