चेल्सीलाई स्तब्ध पार्दै रियल म्याड्रिड सेमिफाइनलमा
मकालु खबर
काठमाडौँ । रियल म्याड्रिड युइएफए च्याम्पियन्स लिगको सेमिफाइनलमा पुगेको छ । गएराती सम्पन्न क्वाटरफाइनलको दोस्रो लिगमा डिफेन्डिङ च्याम्पियन चेल्सीसँग ३-२ गोल अन्तरले पराजित भएपनि समग्रमा ५-४ गोल अन्तरको नतिजा निकाल्दै रियल म्याड्रिड सेमिफाइनलमा पुगेको हो ।
यसअघि पहिलो लिगमा रियल म्याड्रिड ३-१ गोल अन्तरले विजयी भएको थियो । दोस्रो लिगमा भने रियललाई उसको घरेलु मैदानमा चेल्सीले कडा चुनौती दिएको थियो । तर ३-० ले पछि परेको अवस्थामा रियल म्याड्रिडले खेलमा कमब्याक गर्दै खेललाई अतिरिक्त समयमा लगेर गोल गर्दै समग्र नतिजा आफ्नो पक्षमा पारेको थियो ।
खेलको ८०औं मिनेटमा रोड्रीगोको गोलमा रियल म्याड्रिड खेलमा फर्किएको थियो । यस अघि चेल्सीले ३ गोल गरिसकेको थियो । चेल्सीका लागि मासन माउन्ट, एन्टोनियो रुडीगेर र टिमो वेर्नरले गोल गरेका थिए । निर्धारित ९० मिनेटको खेलमा चेल्सी ३-१ गोल अन्तरले अगाडी भएपछि समग्र नतिजा ४-४ गोलको बराबरीमा भएपछि खेल अतिरिक्त समय खेलाइएको थियो ।
अतिरिक्त समयको छैटौं मिनेटमा रियल म्याड्रिडका लागि करिम बेन्जमाले गोल गरेका थिए । यो गोल पछि खेल ३-२ ले जितेपनि समग्रमा रियल म्याड्रिड ५-४ ले अगाडी हुदै सेमिफाइनलमा पुगेको छ भने च्याम्पियन्स लिगको डिफेन्डिङ च्याम्पियन चेल्सी बाहिरिएको छ ।
अब रियल म्याड्रिडले सेमिफाइनलमा म्यानचेस्टर सिटी र एटलेटिको म्याड्रिडबीचको विजेतासँग खेल्ने छ ।
मकालु खबर
